莊思敏爆拿督千金身份成星途阻礙 呻富貴煩惱獲另類「潛規則」

莊思敏（Jacquelin）近年專注北上發展，一向熱愛玩社交平台同粉絲分享生活，最近佢就以「拿督千金進入娛樂圈後會發生甚麼事」做拍片主題，並邀請前經理人一齊大談「拿督千金」喺行內多年秘辛，證明即使係身家8億嘅千金小姐，都未必因富貴背景喺娛圈撈得順風順水。

莊思敏最近就以「拿督千金進入娛樂圈後會發生甚麼事」做拍片主題。

擁有1米76身高嘅莊思敏最初以模特兒身份入行，莊思敏就從未曝光自己有錢家境，連填地址都冇寫過自己家庭住址。直到有次返屋企時，莊思敏遇到同行，自此被發現有米背景，被該位同行到處講八卦，搞到自己錯失好多工作機會，甚至有次收到Model公司電話，指原本有個工作已定好自己係人選，最後公司畀咗另一位女仔，原因係公司覺得莊思敏有錢，因此莊思敏發咗好大嘅脾氣：「如果我真係有錢，我唔需要工作。你唔可以因為我屋企條件，將我嘅機會畀其他人嘛。」莊思敏又指有公司擔心佢家底豐厚而唔願意工作，最終未有簽約做旗下演員。

莊思敏大談「拿督千金」喺行內多年秘辛。莊思敏指曾被一間公司擔心佢家底豐厚而唔願意工作，最終未有簽約做旗下演員。

雖然莊思敏富貴身份令其星途滿是困難，但呢個身份亦成為佢嘅「護身符」，自己唔只未遇過飯局潛規則，因為佢就係飯局嘅富豪。Jacquelin坦言其實有唔少人睇中佢背景，要佢投資先肯畀一個角色，變相另類「潛規則」。
莊思敏嘅拿督爸爸莊寶係馬來西亞華僑，八五年喺香港開公司白手興家，曾經做過香港上市公司嘅主席。莊思敏作為「拿督千金」，家族身家估計約8億元，胞妹是莊思明及莊思華。