陳浩民拗柴骨裂着腳套出席活動 關楚耀生日獲太太贈遊戲機

溫碧霞、余香凝、沈震軒、翁嘉穗、關楚耀（Kelvin）、麥大力、陳浩民同太太蔣麗莎等呢日現身一個活動，麥大力早前因為滑雪受傷骨折，撐拐杖現身好正常，但點解連陳浩民都要戴住腳套現身？

原來陳浩民係因落樓梯唔小心拗柴，原本以為好小事，拖咗幾日先去睇醫生，估唔到原來係骨裂，不過為免影響工作，佢堅持唔打石膏，依家就靠腳套保護，最少要著五個星期。而見到太太蔣麗莎大髀有大片瘀傷，原來係游水時唔小心撞到珊瑚，兩公婆真係禍不單行！

關楚耀啱啱過咗41歲生日，而呢個係佢同太太婚後嘅第一個生日，注重儀式感嘅太太特登準備咗個驚喜畀佢，原來太太送咗部遊戲機，關楚耀開心到將拆禮物嘅片段擺上網同大家開心share。

上年九月誕下第二胎嘅余香凝，最近終於有時間去個小旅行，同好姐妹陳詩欣去咗上海，雖然只係短短兩日，不過叉足電返港，繼續辛苦嘅湊B日常喇！