歌神許冠傑三場個唱圓滿落幕 獻唱張國榮金曲表達對故友思念

歌神許冠傑三場個唱圓滿落幕，喺尾場Sam繼續自彈自唱熱爆舞台，演唱經典金曲《天才與白癡》時，Sam更行近觀眾席同大家握手互動，氣氛熱烈。
 
當晚適逢係已故巨星哥哥張國榮逝世21周年，Sam同好多歌迷一樣，對好友嘅思念從未停止，佢仲特別選唱咗哥哥嘅歌曲《有誰共鳴》，話希望哥哥喺天國都可以聽到佢憑歌寄意。
 
呢晚梁詠琪擔任特別嘉賓同Sam合唱，佢地揀咗首經典嘅男女對唱英文歌《Somewhere Out There》，而嚟到尾場Sam特別唔捨得觀眾，兩度encore唱到凌晨，佢先邀請觀眾打開手機燈光，喺溫情氣氛下演唱《紙船》，而最後佢特別揀選咗一首《珍惜》為個唱畫上完美句號。