黃路梓茵出活動避談黃子佼引混亂 任家萱曾發訊息關心好友

台灣藝人黃子佼持有未成年不雅片，以及被控性侵未成年少女事件，風波持續燃燒，雖然佼佼本人未有露面，就過就連累唔少身邊人，佼佼嘅徒弟Lulu黃路梓茵同蔡凡熙一齊出席活動，Lulu全程笑容滿臉，雖然佢事前講明唔接受訪問，不過活動一結束，大批傳媒蜂擁而上追訪Lulu，場面混亂。

對於傳媒問到最近有冇同佼哥聯絡，對兒少法修法會否贊成等問題，佢都未有回應。追訪期間有攝影師甩咗鞋而咆哮，令場面更火爆，前後擾攘近五分鐘，Lulu終於喺工作人員護送下逼入載貨電梯，不過就全程背對鏡頭，睇得出佢承受好大壓力。

另一邊，同佼佼有超過二十年交情嘅Selina任家萱，出席活動時同樣被追問佼佼嘅問題，Selina就大方承認事發後翌日有發過訊息畀佼佼。佢話事前有深思熟慮諗過要寫咩內容，因為的確係一件幾震驚嘅消息，之後佢就寫上「勇敢面對 珍惜所愛」，但之後陸續有其他新聞，佢就冇再聯絡對方。當被問仲當唔當佼佼係朋友，佢就話目前冇去太多諗法，但係彼此係多年嘅朋友，所以希望對方做到自己寄語佢嘅說話，同埋勇敢去面對。

演藝界因為佼佼事件，發起聯署活動，希望可以修法保護兒童同青少年權益，Selina話自己身為一名媽媽，一定會支持相關議題，而講到新手媽媽嘅生活，佢就話自己適應得非常好，仲話考慮要生多幾個BB，但呢個想再生BB嘅言論將另一半小徐嚇得半死，因為要再努力賺錢養家，不過佢都話如果有，小徐當然開心，全因腰果實在太可愛，一家三口每日都過得美好幸福。