不正常愛情研究所｜直擊陳國麟與女友愛巢 家居布置放閃藏愛的密碼

J2清談節目《不正常愛情研究所》雖然上周已圓滿播映完畢，不過各主持將喺緊接3集「番外篇」跳出錄影廠，到訪各主持嘅家居，揭開佢哋「behind the scene」私人一面。今晚(4號)播出嘅一集就由黃紫恩(Jojo)同胡敏芝(Karen)走訪陳國麟(Doniven)屋企，揭開佢不為人知嘅一面。

Karen 與 Jojo 探訪 Doniven 的新居。Doniven亦同沙律共築愛巢，新居遷入未到一個月。

Doniven同女友張沛樂(沙律) 拍拖接近半年，上年聖誕各自喺網上貼相放閃，宣示主權。而Doniven亦同沙律共築愛巢，新居遷入未到一個月。跟風水師蘇民峰學過風水命理嘅Doniven就向大家介紹，各人就座嘅地方係全屋風水最好嘅地方，佢自豪表示：「呢個係天醫位，有財又有助姻緣，平時同女朋友就坐係度睇電視。」講到得意忘形時，Doniven開始大數女友「罪狀」，自爆先係砌傢俬嘈交，最後要自己完成：「好多嘢唔識，又覺得自己好叻，掛衫勾又整到鬼死咁高，話靚喎。而家每次攞衫都要伸直隻手。」

Doniven 放梳化的位置，是全屋最好風水的天醫位。Jojo及Karen大讚睡床好彈力夠舒服。

到參觀主人房嗰陣，Jojo非常欣賞睡床猛讚好舒服，更即場試彈力，感覺非常滿意。二位女士又發現Doniven將同女友嘅自畫像放喺床尾，Doniven解釋：「放床尾可以成日見到大家囉，是但一個出咗去，只要瞓喺張床，就可以見到大家。」聽落非常甜蜜。之後Jojo又發現一張寄畀沙律嘅明信片，又讀出內容：「老老，我在日本努力工作中，但每分每秒都好掛住你呀！等我返嚟呀！Love you！」

床尾放了 Doniven 跟沙律的畫像，原來有特別意思。

Doniven 在日本寄給女友的名信片暗含密碼。

Doniven接受訪問時表示媽媽已見過女友，表示非常滿意。被問到二人係咪已經到談婚論嫁階段時，Doniven就話：「當然未啦，暫時相處吓了解吓先。」

去年 Doniven 跟沙律在網上放閃，又到泰國旅行。

《不正常愛情研究所》逢周四晚10點半J2(82台)播出