直播靈接觸丨顏國樑患上鱗狀癌險死 彌留之際愛妻請師傅為其續命

上星期播出嘅《直播靈接觸》，首集「警界天師」茅山師傅簡信回同當事人現身同觀眾分享嘅女事主被鬼上身故事，同埋第二集已故粵劇名伶新馬師曾大仔鄧兆尊，佢同嘅紅顏知己陳妙慧（Nana），自爆二人嘅姻緣係得到新馬師曾嘅靈魂任紅娘牽線嘅經歷，都引嚟觀眾熱烈討論。梁思浩、黃紫恩及黃耀英主持嘅《直播靈接觸》引起唔少話題。NaNa喺節目中自爆，佢同兆尊嘅紅線係由祥哥牽嘅！

而29號晚播出嘅一集，就請嚟「積少」顏國樑同佢太太擔任嘉賓。早前患上鱗狀癌嘅顏國樑，今年一月接受鄧英敏網上頻道訪問時，表示接受過化療及免疫治療，期間更透露自己剛走出鬼門關。原來喺藥石無靈階段，顏國樑彌留之際，顏太毅然請師傅「續命」。節目中顏國樑將會親述真實續命經歷，張芯熏師傅仲會即場講解何為種生基、續命書、續命七星燈及教大家計算陽壽嘅方法。至於行善積德係咪可以延壽，同埋點樣提防騙子以續命嚟呃神騙鬼，節目中都會同觀眾分享。
顏國樑
此外，《直播靈接觸》除提供「報驚熱線」、「靈異爆片爆相」方便觀眾參與外，節目播映時電視觀眾仲可以參與互動分享同提出疑問。方法係透過節目供嘅QR Code，登入網頁同兩位黑無常湯之欣、白無常黃瀅仴兩位靚女小編chit chat、派emoji、送心。同時仲有機會贏到由師傅開光加持嘅開運水晶樹，保家宅平安同時，又可催運擋煞！

《直播靈接觸》逢星期一 21:30 星期二 21:35 TVB Plus（82台）播映
黑無常湯之欣同白無常黃瀅仴將會擔任靚女小編。