Mayanne小喇叭丨爆林敏驄成日睇自己粒墨 薛家燕指阿驄講嘢無句真

由麥美恩同曾展望主持嘅節目《Mayanne小喇叭》邀請咗薛家燕、林敏驄同棟篤笑演員Vivek Mahbubani擔任嘉賓，家燕姐當初知道阿驄在場，心情既開心又擔心，佢話有阿驄喺度，分分鐘自己冇機會講嘢，亦都唔知講到乜，因為阿驄好有幽默感，之前邀請佢嚟自己個節目受訪時，獲得幾十萬觀眾收睇，就知佢幾受歡迎，不過家燕姐話阿驄呢日已經好忍得口，講到咁上下都望下自己，身邊嘅阿驄就笑笑口話「你睇吓問咁耐都只係得佢講，因為前輩講嘢，我哋一定要聽。」

個性頑皮嘅阿驄，即使面對住家燕姐，佢都係豹子膽上身，仲話家燕姐點墨生出嚟係畀人玩，家燕姐話「佢成日睇我粒墨，睇吓條毛有冇長到。」阿驄補充話條毛有時係鬈有時係直。家燕姐指同阿驄做節目係開心，但一定要識得忍笑，嘉賓之一嘅阿V都好認同，全程都要忍住笑。

喺節目入面，家燕姐同阿驄已經火花十足，搞到阿驄話下一部戲都要同家燕姐合作，家燕姐聞言就話「你講真先好，但佢講嘢無句真。」當講到想同家燕姐演咩角色，阿驄就話梗係演我女人，因為家燕姐演心口有毛嘅男人好恐怖，點知阿V話要演心口有毛就搵佢，佢仲即場騷心口毛。最後再次向阿驄求證係咪真係要跟家燕姐合作，佢仲話自己從來都唔講笑，家燕姐就自己都係第一次聽到想合作，若果係真就一定好期待。