Mayanne小喇叭丨歷代「獎老」Reunion！獎門人踩場掀高潮錢嘉樂被欽點全因夠口賤？

TVB清談節目《Mayanne小喇叭》由麥美恩（Mayanne）擔任主持，曾展望（GM）擔任助理主持，本周四及五晚上10點半翡翠台播映最後兩集。今晚（18日）呢集兼任《獎門人》現任獎老嘅Mayanne，邀得四位獎老界前輩林曉峰、錢嘉樂、蘭茜及阮兆祥擔任嘉賓，大談參與《獎門人》拍攝嘅喜與樂。雖然嘉樂被專稱「大師兄」，原來第一代獎老竟然係林曉峰（阿Lo）及陳小春，阿Lo爆當年嘉樂被「獎門人」曾志偉睇中接小春棒，全因「把口夠賤」。

蘭茜回想當年玩遊戲時係幾咁投入。

嘉樂憶述當年接到獎門人邀約電話時相當意外，笑言全靠口賤才能先跳出武師界。談到獎門人當年點解睇中阿Lo，嗰陣阿Lo拍《金枝玉葉》，有一場戲講張國榮先生上樓梯，阿Lo做助手跟住後面，當時唔知左腳定右腳甩咗鞋帶：「拍完嗰場後我哋放 Break，返到嚟個甩嘅鞋帶就調轉咗喺另一隻腳。當時導演嗌完Roll機後，我就嗌『咪住，好似唔連戲喎』，大家咪即刻睇番錄影帶，嗰日獎門人喺現場，心諗原來呢條𡃁仔都幾上心，就搵佢嚟做嘢啦！」

「大師兄」錢嘉樂原來係暗藏特別任務。

蘭茜擔任獎老嘅原因就係玩獎門人遊戲嗰陣全情投入，「刨西瓜」及「刨粟米」有關，祥仔暢談當年點樣同志偉、洪天明及鄧兆尊夾計，以各人腳毛及腋窩毛整蠱遲入組嘅姚樂怡，最後遭樂怡喊打喊殺，十分搞笑。

麥美恩都好記得當年姚樂怡係點樣被整蠱，仲大嘆「童年被污染」。

四人大談當年錄影《獎門人》宵夜度橋日常，當年因為電視台大戰，《獎門人》最高峯一星期連播五晚，阿Lo大方分享當年度橋及上班流程日常：「下午三點返嚟開會，一路開到八點五十分。當年我哋就諗咗改歌詞唱啲嘉賓名出嚟，咁每日揸車就要度18隻歌，每個嘉賓要有3隻，返到去獎門人就會坐喺度問邊隻好笑。然後度到食飯，其實係食唔落喎。有時做到一點鐘左右收廠，但未完架，喺化妝間再開會，開到三點，跟住就宵夜，然後再搵地方。記得有一次打風，我哋搵到地方時已天光，成六點幾七點。」

林曉峰初初做第一輯時直認好驚獎門人。

全集最驚喜部分係當眾人輪流模仿獎門人，志偉手持小喇叭走入廠送驚喜，令當時除掉雙鞋跪地扮緊志偉嘅嘉樂大嗌驚驚。志偉一到埗即扮作氣沖沖搞笑咁講：「幾多人打電話畀我，『你仲唔落去？佢哋踩到你一文不值』」，眾人瘋狂互窒，混亂間曾展望竟然大叫志偉「Daddy」，隨即惹起哄動，志偉反應極快接招：「出得街咩？你話畀大家聽媽咪係邊個？！」並親解點解被專稱「阿爸」，志偉指阿爸負責畀錢（埋單）嘛，咁咪叫「阿爸」，蘭茜聞言即指志偉另一外號係「埋單俠」。志偉又會親解《獎門人》換主題曲之謎，答案相當有愛，並與小朋友有莫大關係。

嘉樂講嘢時係咁向上望，當時阿Lo已懷疑獎門人會唔會已經喺現場。獎門人踩場！獎門人嚟咗氣氛即時升溫。曾展望叫Daddy，嚇到志偉即刻望錶，現場陷入一片喧鬧。蘭茜指志偉另一外號是「埋單俠」。