StarTalk丨鐵四角將舞台劇《斷金》帶到香港 張國立細訴彼此默契之情

內地國寶級演員張國立、張鐵林同王剛喺千禧年代以《鐵齒銅牙紀曉嵐》系列紅爆亞洲，相隔多年佢哋再度聯手，同紀曉嵐編劇鄒靜之炮製舞台劇《斷金》。舞台劇巡迴演出七年，全球演出已經超過百場，嚟梗即將嚟到香港公演，主演之一嘅張國立老師，呢日作客《StarTalk》接受主播王鎮泉專訪，細談對香港站嘅期待，佢指今次係團隊展開新一輪嘅巡演，對於三位主演嚟講，即使當年《鐵齒銅牙紀曉嵐》廣為香港觀眾認識，但今次到嚟演出舞台劇，係一件令佢哋特別興奮嘅事。

提到《鐵齒銅牙紀曉嵐》主題曲至今亦令香港觀眾印象深刻，張國立隨即清唱幾句。對於「鐵四角」嘅合作，佢不得不提鄒靜之寫嘅劇本特別有味道，而過去七年佢哋喺舞台劇嘅合作，所產生嘅火花比之前拍劇時更好，越嚟越珍惜彼此。

當初編劇安排佢哋圍讀時候，正好係張國立嘅正日生日，佢話當時仲未確定會唔會演出，純綷係圍讀劇目，佢又提到原來圍讀呢件事係做過兩次，第一次已經係SARS那年，當時圍讀完後就因為疫情而叫停，但佢哋一直都有個願望，可唔可以演一次舞台劇，原來圍讀過程時，大家係無分配角色，但圍讀期間就覺得呢個角色啱你，由你去飾演，呢種就係彼此間嘅默契。

劇目故由清未時代展開，張國立飾演嘅富小蓮係落魄貴族，但即使由富貴變貧窮，都相同睇得開。王剛飾演嘅魏青山心高氣傲，為咗出人頭地連兄弟情都可以不顧，而張鐵林就待人情深意重，一心只愛唱戲。三個素昧平生嘅落魄男人，喺動盪時期相遇、結拜，再因為追求不同人生目標而出現分歧。喺劇名之中亦內藏箇中意義，張國立指喺劇名《斷金》睇出事前係寫做生意，有一句老話叫「兄弟齊心其利斷金」，但係呢三個人結拜嘅時候，一起做生意嘅時候，睇起嚟似齊心，但當有利益發生變化，呢個心就不再團結。整個接近三個鐘嘅舞台劇，就由佢哋三人，再加上兩位女演員，以及一位真正嘅王爺，將王府井成個變遷同整個三佪大時代嘅變遷，全部都演繹出嚟，而且係一直沿著人物嘅命運去講，所以張國立覺得成個劇最重要係人物表演，因為演員投入會帶動台下觀眾睇得入心，可以跟隨角色嘅喜怒哀樂，而一齊去睇時代變遷。

鐵四角感情深厚，佢哋都份外珍惜每次為觀眾演出嘅機會，張國立亦分享對王剛同張鐵林嘅初印象，佢形容王剛係佢合作嘅演員中最絲滑，佢覺得王剛所講嘅台詞同表達能力都非常非常之強。張鐵林就永遠都陪大家貢獻火花，所以佢哋嘅戲好玩就在此。有時候張鐵林表演時產生火花嘅貢獻，一下子就提升出另一種感覺，呢種感覺可能會更有意思，所以佢哋三個人咁多年嚟都維持住一個非常好嘅合作關係。佢指好似王剛咁74歲嘅老藝術家演員，仍然演出一個咁大型舞台劇，係極為罕見，仲要每日都對演戲充滿激情。正正因為大家都理念一樣，所以越嚟越珍惜大家。佢再指佢哋直至而家，化完妝之後，大段台詞都再對台詞，就好似每次都係新演出嘅一樣。佢話有一日突然感覺到，佢哋三個人有種無講出聲嘅表達，就係演一場少一場，佢亦相信觀眾都有一種依依不捨嘅感覺。

當被問到自己跟張鐵林所演嘅皇帝，有啲咩特質分別時，張國立就話自己演嘅係平民皇帝，比較愛老百姓，而張鐵林所演係屬於好有氣勢，只係忙後宮嘅事，因為佢演嘅係私訪去走入民間，而張鐵林演嘅《還珠格格》全部係後宮嘅事。

演出名稱：《斷金》
演出時間：5月17-18日 19:30 
                  5月19日 14:30 （16/5為非公開場次） 
演出地點：香港文化中心 大劇院
出品制作：龍馬社
主辦單位：香港北京社團總會有限公司