豹嫂騷長腿重唱當年經典歌 好友輪住比Like猛讚好

同為音樂人出身嘅 豹哥 單立文 同 胡蓓蔚 2008年成婚 ，上星期慶祝結婚16周年，甜蜜如昔嘅佢哋恩愛滿瀉，合照中嘅笑容真係可以話盡在不言中喇。而當年以歌手身份出道嘅豹嫂，早前指黃翠如提出叫自己再唱歌唔好埋沒好歌聲，佢拍片獻唱被《婚後事》選為主題曲嘅《傾城》之後，近日再接再厲翻唱自己嘅舊作。

身穿小背心短褲嘅豹嫂，呢日拍片翻唱自己2007年專輯中嘅點題作品《Don’t Think Just Do》，仲話要將呢首歌獻俾當年嘅唱片監製，又指自己依然非常熱愛唱歌，而一眾老友好似 胡定欣、黃翠如同袁偉豪等亦大讚，林施嬅仲提豹嫂拍片要望鏡，而身處外國嘅陳法拉仲話自己記得晒歌詞咁話呀。