張繼聰下周衝出香港首開巡唱 答謝歌迷改歌單重新編排

近年操肌Fit爆又不時揸住古董電單車遊車河嘅嘅 張繼聰 唔止重新投入歌唱事業，下星期六仲會舉行巡迴演唱會澳門站，原來今次係阿聰首次喺香港以外舉辦個唱，所以對今次演出非常期待。佢仲話為答謝購票捧場嘅歌迷的支持，特別將歌單作出調整，仲會演唱部份上次香港個唱未有獻唱嘅歌曲。

據指經修改嘅歌單當中，部份歌曲係十多年來都未曾現場演唱過，阿聰話：「我一直同Band Leader商量點樣去將音樂做好，因為好多朋友都係透過電影或者電視劇作品認識我，希望大家透過今次演唱會，可以見到真正嘅我，所以服裝、歌曲編排同舞台設計上，都將我最喜歡嘅呈現俾觀眾。為咗做好巡唱準備，我亦一直跟歌唱老師練習，務求當晚表現得最好，等大家再次記起我除咗係演員之外，亦係歌手。」