芷珊約您丨張敬軒罕談感情事自爆曾愛上一人 自揭有疑病症曾為自己安排後事

黎芷珊主持嘅《芷珊約您》，28號晚播出嘅一集嘉賓有張敬軒，芷珊喺紐約直擊軒公美國站巡唱圓滿結束後，再同對方嚟個深度專訪。
芷珊喺紐約直擊軒公美國站巡唱。
當年隻身嚟香港發展，到今日成為香港樂壇頂流之一，軒公坦言：「一個內地人嚟香港（發展），你會覺得你有咩唔好嘅新聞，會好似變咗一個內地人嘅典範（代表），好多因素令我覺得輸唔起。」軒公又指為咗keep好把聲令佢仲可以唱到以前嘅歌，就連最愛嘅酒都唔敢多飲。 芷珊問到而家嘅佢快樂嗎？軒公坦言快樂，仲話行到42歲呢兩年係自己人生最好嘅時候，因為可以有自己嘅團隊，無論演唱會、拍Youtube定派歌都有好好嘅反應，加上父母生活安穩 ，可以負責得起自己想食想去嘅地方，所以佢覺得人生好圓滿，只係要維持落去唔容易。
演唱會後二人嚟個深度專訪。
鮮有提及感情事嘅軒公，喺節目中坦言自己開始有想被照顧嘅念頭，當被問到有冇遇過適合嘅對象時，軒公諗咗好耐先開口，表示喺娛樂圈好難識到人，同時自己亦唔輕易畀人進入生命中，之後佢舉例表示：「譬如有Potential成為情人嘅人，同一班Friend嚟到我屋企，會喺我屋企攞起啲嘢嚟睇睇，但係佢擺唔返啱個位，咁我就會行埋去擺返啱，咁就完咗喇。」芷珊向軒公嚴刑迫供拍過幾次拖，軒仔說：「拖過一隻、半隻手仔咁啦，我係一個講將來嘅人，但一去到講將來標準就會唔同，我係冇『不如行吓睇吓點先啦』呢一種，我所有嘢都要Well Planned。」
 軒公指自己人生已經好圓滿。
軒公不諱言自己有真正愛過一個人，又指父母影響咗自己嘅愛情觀：「佢哋兩個係南轅北轍，佢哋到依家都係唔夾，我見到我媽嘅痛苦，嗰種矛盾到依家40幾年都係冇解決，佢哋到離開嗰一日都唔會解決得到，我唔可以畀我人生係咁。」軒公更直如果遇到自己Commit嘅另一半，佢會同對方Share人生最後嘅時間。
 軒公指自己嘅愛情觀受父母影響。節目中軒公罕有談及感情事。
節目尾聲，軒公應芷珊要求自爆一個小秘密，佢話喺2012年時，突然有日自己十隻手指無故變黑，無論點洗都洗唔到，就好似中毒一樣，軒公表示自己係個有疑病症嘅人，加上當時有抑鬱症，所以被醫生朋友即時安排入住私家醫院，軒公話當時係佢係人生第一次，覺得如果自己突然離世父母會點，佢話：「我打電話畀我身邊嘅人安排好晒啲嘢，之後突然之間發現，嗰排着緊嘅牛仔褲點解摸完之後（對手）愈嚟愈黑嘅？原來係條牛仔褲甩色，一條牛仔褲冇咗我10萬蚊，（為咗呢件事）整咗10萬蚊呀住院！」軒仔繼續分享當時自己嘅「身後事」安排：「我打電話畀Johnny Yim，同佢講要做幾個Project，叫佢幫我編曲，如是者Johnny幫我整咗70首歌，嗰70首歌係舊歌翻唱，我就錄晒。雖然牛仔褲事件已經過咗去，但呢件事好似一個炸彈，如果我突然間走咗，我剩低嘅嘢係唔夠阿爸阿媽過生活。」

《芷珊約您》逢星期日 21:30 翡翠台
節目尾聲軒公自爆小秘密。