蕭敬騰 五堅情 小宇等來港開騷 婁峻碩稱於Tyson Yoshi面前唔敢除衫

首次嚟到香港舉行嘅《春浪音樂節》，第一日演出陣容包括蕭敬騰、W0LF(S)五堅情、小宇 宋念宇、艾薇、冰球樂團、理想混蛋、THE HERTZ及絕命青年。雖然蕭敬騰向來有雨神之稱，不過呢日幸好天公造美無落雨，令佢可以打破「雨神」宿命。
蕭敬騰打破「雨神」宿命。老蕭玩得勁high。
至於蕭敬騰嘅小師妹艾薇，除咗同邱鋒澤合唱新歌外，佢仲特登為香港嘅歌迷準備咗份特別禮物，艾薇話：「跟住落嚟我準備咗個小小surprise畀大家，因為都嚟到香港啦，梗係要唱廣東歌係咪先。」之後就唱出《海闊天空》，令fans尖叫聲不絕。
艾薇唱廣東歌《海闊天空》。仲同邱鋒澤合唱新歌。
台灣組合五堅情出場時有台下觀眾大叫除衫！對於fans嘅要求，邱鋒澤就話自己未練夠肌肉，而同Tyson Yoshi勁老友嘅婁峻碩，就笑言對住香港藝人好難夠膽除衫：「來香港很難脫，藝人都很壯健，你看Tyson Yoshi我在他面前怎樣脫？」至於生日在即嘅陳零九，就話到時會簡單同家人慶祝就開心。
五堅情出場時被fans叫除衫。
提到日前台灣大地震，邱鋒澤表示當時大家都好慌張：「希望地震快點停止，因為現場都有餘震。盼大家平安不要想太多，這一切快點過去，你想太多會更焦慮、會更恐怖，大家都冷靜下來。」而家鄉喺花蓮嘅婁峻碩，就透露家中親友安好。
呢晚演出嘅仲有小宇。