StarTalk一氣呵成版｜國寶級演員張國立來港演出 參演舞台劇激活心中猛火

69歲嘅內地演員 張國立 多年前憑電視劇《鐵齒銅牙紀曉嵐》紅遍亞洲，其實呢位國寶級演技派當年係演舞台劇起家，早前佢接受主播 王鎮泉 專訪時，自爆覺得對舞台劇界有所虧欠，希望再為培育自己成材嘅藝術貢獻。

所以除咗劇劇作品之外，近年張國立老師都回歸舞台劇界演出，而佢同《鐵齒銅牙紀曉嵐》鐵四角 張鐵林 王剛 以及編劇 鄒靜之 共同炮製嘅舞台劇《斷金》亦將展開新一輪巡演，更加設香港站，到時香港嘅觀眾就有機欣賞到三大演技派嘅神級演出喇。

張國立老師除咗珍惜每次同老拍檔們合作嘅機會之外，佢亦話估唔到自己咁嘅年紀先發現心中仍然有團火：「我原來是一個話劇(舞台劇)演員，我從話劇開始表演生涯，後來大部分拍電影、電視，和劇壇告別了。但現在歲數大了突然發現欠了舞台一個債，因為這個舞台把我鍛鍊成一個專業演員，當我現在回到戲劇的時候，我對戲劇的火種沒有熄滅， 砰一下就點燃了。」

張國立老師同時分享同契女 周筆暢 嘅相處軼事，佢坦言不時都會喺社交平台點贊支持契女，更大讚契女越做越好，近年歌曲風格力求進步，出新歌嘅頻率都見到佢嘅努力。

好客嘅張國立老師又帶泉叔參觀佢喺深圳坪山嘅戲劇社區，佢更期待日後可以舉辦坪山國際戲劇節，將坪山基地打造成粤港澳大湾區重要嘅戲劇品牌輸出地，其中一個劇場更保留廢墟嘅一角，突顯歲月嘅味道。 

《斷金》香港站
演出日期：2024年5月17-18日 19:30／ 5月19日 14:30 （16/5為非公開場次） 
演出地點：香港文化中心 大劇院
出品制作：龍馬社
主辦單位：香港北京社團總會有限公司