經典電影《開心鬼》40周年｜黃百鳴邀老友重聚睇戲 傅明憲憶14歲演續集片場趣事

40年前嘅經典電影《開心鬼》系列成為香港人嘅集體回憶，不僅締造當年票房神話，電影更係黃百鳴當年由幕後轉戰幕前嘅處男電影，對佢嚟講意義重大，藉住電影上映40周年，百鳴哥特別選擇喺自己生日正日舉行重映活動，並邀請昔日演員及400位台前幕後朋友重聚睇戲，包括李麗珍、傅明憲(Gigi)、葉子楣、高志森、關寶慧、楊明、莊思明、莊思敏、麥秋、袁潔瑩。

百鳴哥開心能夠與眾多老朋友相聚：「原來40年前《開心鬼」開鏡又係4月8號，時間過得好快，眨吓眼就40年，拍攝時嘅難忘事多到講唔晒，但好開心40年後見番大家仲咁老友，大家都仲好後生冇乜點變。」至於會否有意再重拍電影？百鳴哥斷言拒絕，笑言搵唔到一隻咁靚仔嘅開心鬼(黃百鳴飾)。

當年Gigi有份演出《開心鬼》系列第二集《開心鬼放暑假》，當時仍然係學生妹嘅Gigi話拍呢部戲時只係得14歲，仲係童工，間中回憶起兒時工作都好有趣，而且過程非常開心，Gigi話：「印象最深刻係第一日開工屋企人好唔放心，叫咗工人姐姐陪我開工，一啲都唔辛苦，仲有好多零食，亦好準時收工送我返屋企。」