林予晞無懼封殺譴責黃子佼 呼籲社會為受害人釋出善意

台灣藝人黃子佼所近日牽涉嘅性侵風波越捲越激烈，再有一位受害人K小姐出面指控黃子佼多年前以約拍藝術照之名，約當時只有17歲嘅K小姐到工作室，繼而喺拍攝途中進行性侵。除此之外，黃子佼因被檢方查獲持有多部女性偷拍私密片，其中7部主角更係未成年少女，加上喺調查中發現黃子佼係涉及「台灣N號房」嘅知名偷拍片網站高級付費會員，可以私人定製想睇嘅內容。

林予晞作為第一位喺社交平台發聲譴責嘅黃子佼藝人，表示就算因此冇工作都要企出嚟。呢日林予晞喺出席活動時就解釋自己發聲只係做咗一個平常人應有嘅反應，尤其事件嚴重非同小可，而且黃子佼擺明犯罪，亦牽涉嘅惡意係非常之大。

黃子佼作為一位出道多年嘅資深藝人，加上師父係喺台灣演藝圈有舉足輕重地位嘅「綜藝教母」張小燕，所以好多人擔心林予晞星途因正義遭到封殺。林予晞呢日再次強調自己並唔擔心封殺問題，佢就係要企喺受害者身邊，只有不停去講，將以前閉口不談嘅事攤喺陽光之下，大家釋放多啲善意同溫暖，令受害人有勇氣去勇敢面對過去受到嘅惡意。

黃子佼老婆孟耿如因出帖文表示力撐老公到底而被網民鬧，其後孟耿如關閉社交平台帳號。有人認為禍不及家人，亦有人認為孟耿如要盡快離婚，但林予晞就唔想模糊重點去評倫私人事情，自己只想針對犯罪事件發聲。