陳家樂推廣電影業界活動 獲錢嘉樂傳授湊B心得

香港電影業界為咗鼓勵觀眾入戲院睇戲，特別喺4月21號舉辦「全港戲院日2024」，當日全港63間戲院，會劃一票價為30元，作為活動大使嘅陳家樂同錢嘉樂現身活動記招宣傳，佢哋都話入戲院睇戲感受的確唔同，錢嘉樂話當年仲有龍頭戲院嘅時候，自己會睇午夜場，當時嘅氣份就係千幾人一齊睇到精彩就一齊拍手掌叫好，身為新一代演員嘅家樂聽到都話好有氣氛。錢嘉樂話對於當時自己係龍虎武師初哥嚟講，嗰種興奮心情比加人工仲開心。

家樂同太太連詩雅嘅BB將會喺7月出世，呢排家樂都預習點做爸爸，早前仲去探望洪永城嘅初生囡囡，實習吓點樣抱BB，不過佢話自己好緊張，抱咗唔夠一分鐘，條頸已經硬晒。身為兩囡之父嘅錢嘉樂就話對住自己出品嘅BB係唔會緊張，家樂就話BB嘅英文名已經諗好咗，不過佢仍然保持神秘唔透露BB嘅性別，家樂講到先前講笑話BB個名叫「陳設」會好型，錢嘉樂笑言話我以前被人提議改BB個名叫「錢七」。家樂講到改中文名，最重要係過到太太嗰關，不過「陳設」就唔批。