炎明熹19歲生日獲群星拍片祝賀 盼盡力做好自己唔會辜負大家期望

Gigi炎明熹正式踏入19歲喇！雖然喺4月9號嘅正日生日要喺演唱會綵排中渡過，但係佢嘅音樂團隊就連同Felix林智樂，一齊為Gigi送上生日蛋糕，Felix更送咗個金算盤畀Gigi，祝佢快啲可以買到十層樓呀！Gigi收到嘅生日驚喜一浪接一浪，佢嘅排舞團隊亦送上精心嘅生日驚喜，令壽星女大吃一驚之餘仲非常感動。

三場演唱會舉行在即，Gi炎粉早前就為Gigi搞咗個以動物派對為主題嘅生日會，而一早圈中好友鍾柔美、詹天文、張馳豪、林沚羿、蔡愷穎、蔡卓妍、AGA江海迦、陳煒、陳庭欣等，亦拍片送上祝福。

其實呢個party除咗為Gigi慶祝生日外，一眾Gi炎粉仲想為佢好好減壓，所以佢哋準備咗好多遊戲同表演節目畀Gigi，令佢相當感動。對於Gi炎粉對自己嘅支持，Gigi就同大家嚟個真情告白，話希望大家可以見證住自己嘅成長，同時亦希望自己可以盡力唔辜負大家對佢嘅期望，Gigi話：「雖然有陣時我知道自己能力未做到，但我希望有一日大家可以見證到呢個人（指自己）嘅成長。一人難順百人意，而百人亦難順一人心，所以我會盡力地去做。」