黃紫恩變身道姑拜狐仙增魅力 Doniven學畫符求同女友沙律和合

J2（82台）清談節目《不正常愛情研究所》，上周已圓滿播映完畢，緊接播出「番外篇」，跳出錄影廠，到訪各主持屋企，揭開佢地「behind the scene」私人一面。上星期黃紫恩（Jojo）同胡敏芝（Karen）殺上陳國麟（Doniven）新居，洩露佢同女友張沛樂（沙律）嘅甜蜜同居關係。

Jojo平時返道觀會唱經、畫符，而Jojo要主持求神、祈福法事時會披上紅袍。

11日晚播出嘅一集，Doniven回饋Jojo，到佢修煉嘅道場參觀。Jojo收起平時性感一面，變身虔誠道姑。Jojo話平時返道場修道，主要係唱經寫符，如果有祈福之類嘅法事，就會披上紅袍幫手。

Doniven 拜狐仙祈求與女友和合，師傅指導寫符。

Doniven喺道場內發現設有狐仙殿，師傅就即場解釋狐仙同狐妖嘅分別︰「狐仙係正宗神仙，狐妖係偏邪門即係狐狸精，唔好拜錯。」佢又透露唔少女善信會帶化妝品拜狐仙，並由自己開光加持，能增加人緣魅力。原來Jojo亦係其中一份子，除咗使用拜過嘅化妝品，仲同狐仙上契，佢分享心得︰「要自己試過，先知有無用。我試過噴同一款香水，用開過光嘅特別多異性同我講『今日你隻香水真係好香』。同狐仙上契之後，真係未試過同時間咁多異性喺身邊出現，識咗好多朋友。」

變身道姑的 Jojo收起平時的性感。

修道其中一項修行就係畫符，Doniven當日就學畫和合符，希望避開爛桃花，可以同女友沙律感情更進一步。師傅仲透露好多人到道堂要求做和合法事促進感情︰「我唔係立亂做，要問祖師爺，唔係我哋會孭孽債。就算兩夫妻做完，感情有改善唔係永久，法事只係幫雙方勾起愛意，重要係要大家溝通同經營。」節目分享有次為兩夫妻解降，落降者係老公嘅泰籍小三，佢話︰「老公中降晚晚去咗小三度唔返屋企，而老婆就晚晚撞鬼。最後解完降老公嘔咗一大堆綠色物體出嚟。」情況駭人聽聞。

Jojo穿上道袍修道。

《不正常愛情研究所》逢周四晚10點J2（82台）