紅白大戰｜中聲2成員反模仿評判笑爆 伍Sir肥媽等上台唱改編金曲

雖然賽果早有定論，不過今屆嘅《中年好聲音2紅白大戰》星期日晚將會再決高下，除咗18 位「中2生」之外，節目仲會有《中年好聲音》首屆冠軍 周吉佩 同「中1生」 支嚳儀 分別擔任白組同紅組嘅領隊，而兩隊選手分別係白組選手 譚輝智 黃劍文 劉威煌 陳俞霏 陳蒨葶 林若盈  王玥 梁浩賢 同 甘永傑 。紅組就包括 古淖文 顏米羔 安雅希 沈宗賢 陳燕娜 鄭梓浩 劉可 王學琳 尹新杰 。

一眾中2生之間激鬥嘅紅白大戰星期日晚播出

而評審就繼續有 肥媽 伍仲衡 張佳添 同 周國豐 外，再加入「小辣椒」 谷婭溦 。而節目當中最驚爆嘅，莫過於係「中2生」會同評審「互換身份」。古淖文、譚輝智、顏米羔、黃劍文、陳俞霏將分別扮演陳慧嫻、伍仲衡、肥媽、周國豐同張佳添；至於幾位評審就會輪流出場獻唱自己親自再填詞或重新改編嘅歌曲。

伍Sir同周國豐將會上台合唱譜上新詞嘅《低分之王》

一向俾分出名以「手緊」見稱嘅伍仲衡會孖住周國豐打頭陣獻唱親自改詞嘅《低分之王》，劈頭第一句就引爆笑彈同共鳴：「我畀分不夠善良， 你別皺眉…」，之後伍Sir又自踩對耳生到上額頭，十分啜核！以連串抵死歌詞唱盡自己、周國豐同《中聲2》搞笑事嘅伍Sir，最後「瞓晒地」謝天下，更被周國豐喝止：「夠喇！」。車婉婉喺表演後仲笑言：「你(伍仲衡)根本係畀作曲耽誤咗嘅填詞人！」周國豐仲自爆專誠喺表演前搵韋綺姍惡補歌藝。 

中2生就會反轉扮演幾位評審

而張佳添同肥媽獻唱亦先後成功炒熱現場氣氛，肥媽仲親自填詞答謝各傳媒一直以嚟對《中年》系列嘅支持。 除咗台上表演精彩，台下評分時亦相當有趣；五位「偽評審」中，以譚輝智同黃劍文嘅「還原度」最高，輝智除咗學足伍Sir經常喺鏡頭前展露嘅疑惑表情，搞笑技能解鎖嘅佢，又學對方大講港普，其中一句「我要跳出我的comfort zone」就引爆全場掌聲喇。

輝智交足戲扮伍Sir嘅無奈不解

至於黃劍文除咗四眼Look同認真眼神倒模周國豐，水蛇春嘅「專業對白」亦令全場笑破肚皮，而古淖文同顏米羔就選擇以誇張style扮演慧嫻同肥媽，仲玩轉慧嫻投入至一度忘記畀分嘅經典場面兼學慧嫻晒英文：「You are what I am looking for！」米羔更高度還原肥媽喊包一面，全程不斷起身坐低、同觀眾互動又同譚輝智扮鬧交模仿肥媽嘅「《中年》日常」。

顏米羔就神還原肥媽嘅表情動作

《紅白大戰》除咗好歌同連場爆笑之外，亦不乏感動環節。眾人先後獻唱《流星雨》、《Today》同《差一點我們會飛》，加上 屏幕播放大量比賽期間嘅珍貴回憶同感人片段，令唔少人先後感動落淚， 當中以安雅希同車婉婉喊得最犀利。

台下嘅大家都睇得非常開心

最後，大家又輪流感性發言，劉威煌話：「我覺得喺呢個比賽入面，我哋個個都係贏家，因為我哋識咗一班好好嘅兄弟姊妹。」而黃劍文就話：「由那些年開始我哋成為好朋友，一齊追夢，依家我哋係大家庭。」

一眾成員最後嘅感性發言更加非常溫馨

《中年好聲音2紅白大戰》星期日晚 21:15 翡翠台