梁朝偉余香凝封金像影帝影后 洪金寶期待有機會角逐導演獎

第42屆香港電影金像獎圓滿落幕，《金手指》全晚奪得六個獎項成為大贏家，當中包括最佳男主角梁朝偉，不過由於偉仔身在外地拍緊新戲，所以由太太劉嘉玲代為領獎，今次亦係偉仔第六度榮封金像影帝，而佢對上次獲得呢個殊榮已經係15年前。至於影后就由大熱嘅余香凝憑《白日之下》獲得，Jennifer喺台上特別多謝老公同埋一對仔女。

男女配角方面同樣都係《白日之下》嘅囊中物，由姜大衞同梁雍婷奪得，自認寶刀未老嘅John哥表示永不言休，仲向太太李琳琳發表愛的宣言，話今年啱啱係佢同太太結婚50周年，我本來想請好多朋友慶祝，但李琳琳就主張低調，所以John哥就決定將呢個獎送畀太太。至於講到戲中演員林保怡失落最佳男主角，John哥就相信對方唔會失望。

而今屆終身成就獎就落咗係洪金寶手上，縱橫影壇60年嘅大哥大，就話獲獎一刻覺得開心又驚喜，同時佢話好期待有機會角逐導演獎，大哥大話好想構思新戲，但因為滿腦子都係諗住食嘢，尤其近年因為健康問題，被太太禁止佢食餐蛋麵，搞到佢成日都心郁郁好想食，而家只可以早晚食青瓜、中間就食蕃茄，佢仲講笑話自己而家血糖無事，但係就營養不良呀！

賽果揭曉前嘅紅地氈一樣成焦點，除咗有唔少夫妻檔雙雙對對現身之外，黃子華亦率領電影團隊出場，氣勢十足，香港女神鄧麗欣同大馬女神林明禎，以一黑一白造型性感登場，而久未現身香港活動嘅Angelababy就同馮德倫擔任頒獎嘉賓，劉嘉玲雖然單拖赴會，但係氣場仍然強大，佢入場後嘅龍蝦禮服更加係成為一大焦點呀！