呂良偉愛子考入國家救援隊 稱囝囝感情狀況相當神秘

一向致力行善嘅呂良偉，呢日就同太太楊小娟、舅父同埋嬸嬸，去到一間護老院探訪。呂哥除咗捐出15萬之外，仲同院舍嘅公公婆婆傾偈。

呂哥助人為快樂之本嘅行為亦感染埋囝囝，佢透露而家長駐北京工作嘅囝囝，近日仲考入去國家救援隊幫助有需要嘅人，呂哥話囝囝要學急救、應對突發事件等，對於囝囝已經正式成為隊員，呂哥就話好開心，同時佢亦同囝囝話，要幫人一定要自身夠強大先有力量去幫助別人。

話咁快囝囝已經22歲，問到呂哥知唔知個仔嘅感情狀況？佢就話阿仔有啲神秘，雖然話自己有女朋友，但就係唔帶返嚟見佢同老婆，呂哥話感情事冇得逼，所以自己唔會畀壓力個仔，仲同佢講最緊要自己開心呀！

講到早前梁朝偉奪金像影帝後，王晶喺社交平台發表自己睇法，批評偉仔演技過火，又認為佢應該主動宣布唔再參加獎項角逐，畀多啲機會年青一輩，呢日呂哥都有發表自己睇法，話演員最重要用心做好一件事，口碑自然就會出嚟，每個演員都應該向住目標進發。