李龍基聞未婚妻加控一罪兼押後審訊 發誓不離不棄等待Chris

李龍基未婚妻王青霞（Chris）早前因涉逾期居留、使用虛假文書等6宗罪，遭入境處拘捕接受扣查，被還押大欖懲教所，4月16號早上喺沙田裁判法院開審，不過案件再有新進展，控方指36歲Chris喺違反逗留期間接受工作，被新增一項控罪，令Chris孭上7宗罪喺身。

案件押後至5月28號續審，Chris繼續還押大欖懲教所候審，基哥一早就到法院準備旁聽，希望真身隔空鼓勵Chris，佢話自己抱平常心，又指自己瞓咗兩個幾鐘頭，聽審前一日有探未婚妻，Chris嘅心情亦係平常心，對於傳媒問佢係咪瘦咗，基哥就話自己係減肥。

當基哥知道Chris被加控一罪，心情顯得好低落，離開法院時再次忍唔到情緒，當場激動落淚，仲喊住向Chris表白闢謠，佢話對住燈火發誓絕對唔會唔要未婚妻，仲同未婚妻講自己係唔會變。基哥透過鏡頭向未婚妻講唔使擔心，一定會支持Chris，基哥就話未知Chris得知自己再被新增控罪嘅心情。

講到Chris仲要還押到5月，會唔會擔心喺懲教所情況，基哥話會日日去探未婚妻，因為每日見一見面，令Chris安心啲。問到每次見面時，Chris有冇情緒低落同喊？基哥話初時都有，而家都開始接受。至於自己雖然有時心情較為激動，但都冇需要其他人安慰。