佘詩曼3年冇去旅行盼冰島睇極光 小富婆罕有分享可攻可守理財心得

新聞女王佘詩曼人氣高企，最近接國際品牌邀請擔任代言人，呢日拍攝宣傳片，阿佘呢日同小朋友合作無間，更主動冧小演員一齊拍攝執行李場口，阿佘坦言3年冇去旅行，佢好想去冰島睇極光。

阿佘去旅行好有冒險精神，不過佢喺理財方面就相當精明，難怪佢喺圈中公認嘅小富婆，阿佘更罕有分享理財心得，佢認為理財跟演戲一樣，有時係可攻可守，主要係睇時機，喺適當時間作出投資，譬如銀行息低，手頭有錢就買層樓，如果仲未儲到錢，銀行息高就擺喺度儲蓄，若果自己理財唔叻，就應該諮詢專業意見。