網民過份關心未能回覆慘被鬧 文頌男懇請給予空間打大魔王

舊年公開確診患有罕見嘅尤文氏肉瘤嘅《不正常愛情研究所》主持文頌男（Koba），經過一連串治療後，而家仍然奮力同病魔戰鬥。近日佢就喺社交平台以「自從我病咗之後，好似由感謝大家，變咗服務大家。」為題分享近況。
Koba積極抗癌。
Koba話近日收到源源不絕嘅DM。每個人都希望佢回覆，不過佢唔回覆嘅話，就發生有人喺佢直播上面鬧佢。Koba指知大家都好想同佢做朋友，其實佢都好歡迎同大家做朋友，亦都嘗試盡量回應晒大家嘅DM，尤其一啲有用嘅資訊，Koba係好感謝大家提供畀佢。
喺IG發帖文表示無奈被罵。
面對海量嘅訊息，Koba坦言冇辦法全部回復，尤其係最近每日都痛，根本分散唔到注意力去回覆大量嘅訊息，佢表示同大家講句唔好意思，知道大家都好熱心好關注，佢已經收到大家嘅心意，即使未必可以及時回覆，但都會盡量睇晒大家嘅DM，同時亦盡量參考大家建議嘅飲食清單。
Koba感謝大家對佢嘅關懷。
面對大家嘅愛，Koba喺文尾都話好感謝大家對佢嘅熱心同關心，除咗收到大家嘅捐款之外，仲有一啲膳食補充劑去幫助控制病情，佢話「冇你哋嘅支持我未必可以走到嚟而家呢一步，我對於以上種種嘅支持同關懷表示感激，多謝大家！同時都希望大家可以畀多啲空間我，體諒一下我。同病魔搏鬥係好辛苦、好困難嘅一件事情，希望大家繼續幫我集氣，打倒呢個大魔王！」

Koba不時會喺社交平台更新自己嘅情況。