陳曉東啟動30周年巡迴演唱會 拍海報被要求剝衫露點騷胸肌

為咗紀念入行30周年，陳曉東喺社交平台宣布舉行30周年世界巡迴演唱會，嚟梗30號會喺廣州舉行演唱會啟動儀式，稍後會公布詳情。
陳曉東為演唱會拍攝海報。
今次演唱會宣傳海報，東東戴上白色雕塑般嘅通窿高領頸箍，再以正、側兩面帶出呢次演唱會係紀念入行30周年，每一面代表10年，東東話：「海報概念係我同今次導演一起傾， 呢次係設計師koyo特別設計一款3D 打印嘅neck piece。其實最初呢個模型訂做起嚟好費時間，廠商為咗保持質量，又要打印又要拋光，結果出嚟太大，因為最近忙於開會籌備演唱會，所以未能親自去量身訂做，size做太大了，無法同其他服裝一齊著，拍海報嘅時候唯有儘量調角度。」最後導演索性要求東東脫掉外衣拍攝，當工作人員幫佢剝衫時，期間更露出健碩胸膛，東東話：「第一次拍海報被人剝衫影，加上佢哋拍makingof ，只能邊影邊尷尬笑 。」
陳曉東為演唱會拍攝海報。
發佈會當日，同時舉行巡迴演唱會嘅啟動儀式，同歌迷見面會，東東話：「官宣時候獲得各地歌迷熱烈反應，都話想嚟發佈會，一定要睇演唱會。所以主辦方亦有安排現場簽名演唱會海報環節以及紀念品答謝多年來支持的歌迷朋友。」 
福利照。
 東東透露目前灌錄新歌，希望盡快做好喺演唱會度唱。問到係咪有準備到香港以及台灣開騷，東東話：「有啊，一直喺度籌備，除咗內地以及其他城市嘅鋪排，特別係香港台灣星馬，希望快啲獲得場地批准，能夠同各地歌迷朋友共同紀念一下呢30年。」