將組隊對戰葡萄牙傳奇名宿 陳百祥牙擦擦要挑戰費高

陳百祥代表明星足球隊同香港足壇名宿陳志康，呢日現身澳門出席記招宣傳五月舉行嘅五人足球友誼賽，現場仲有主辦方代表何超鳳。叻哥將會同明星足球隊幾位精英吳國敬、林文龍、陳國坤、張兆輝，以及香港退役足球名將山道士等組成大灣區飛龍，對戰由葡萄牙傳奇名宿費高、紐奴高美斯、列卡度、COW SIR陳志康等組成嘅葡萄牙傳奇切磋球技，叻哥雖然年屆74，但係佢對自己嘅球技同體力相當有信心，一定要落場咁話，佢仲話好想同費高切磋球技，而同叻哥同為領隊嘅陳志康，就話叻哥必定係球場上嘅隊長，因為對方對三地嘅球員都好熟悉呀。

難怪叻哥咁牙刷，事關明星足球隊頻頻凱旋而歸，早前佢地對戰村超嘅賽事，喺內地網上平台吸引70幾億嘅點擊，而活動前一日，明星足球隊先喺湖州以6比4小勝對手，講起呢場波叻哥毫不謙虛，直認自己係功臣，因為佢有份負責編排出場人馬，終於反敗為勝，喺關鍵時刻博到12碼，叻哥當機立斷換人，由校長射12碼，結果成功咗。講到最近叻哥喺內地視頻非常活躍，仲因此而爆灴，叻哥就話完全係無心插柳柳成陰呀。