獨家丨黃劍文與粉絲BBQ 對已婚傳聞感莫名其妙

黃劍文因為參加《中年好聲音２》而人氣急升，吸納咗唔少支持者，呢日Kimman就同Fans搞咗個BBQ  Gathering ，一齊開心聚一聚，Fans除咗大合唱歡迎Kimman外，有fans更送咗一幅人像油畫畀佢，令Kimman相當感動，而經過呢次Gathering後，Kimman就話希望好快可以再舉行一個小型音樂會。　

早前Kimman喺《中年好聲音２慈善演唱會》上有破格嘅演出，唔單止舞王上身，佢同陳蒨葶台上激嘴一幕亦引起好大迴響，仲因此被人重提已婚嘅傳聞，呢日Kimman就話要趁機澄清下，強調自己從未結婚，亦都無小朋友，對於呢啲傳聞都感到莫名其妙，得啖笑呀！至於成家立室係咪佢短期目標？佢就話而家事業上發展唔錯，又做到跳唱呢一環，絕對係佢一大夢想之一，所以佢都想珍惜而家得到嘅機會，暫時專心工作先呀。

呢晚Kimman除咗同粉絲BBQ外，緊係唔少得攞住佢心愛嘅結他，唱歌冧下大家啦，佢仲同粉絲大合唱《愛很簡單》同埋《我願意》，氣氛不知幾溫馨呀。