謝安琪分享留學儲蓄人得 不捨送兒子到海外升學

現今社會所有家長都好關注小朋友嘅升學問題，作為父母嘅謝安琪同徐榮呢日現身一個留學儲蓄講座，吸取專業智識。身為兩孩之母嘅阿Kay更分享點樣輕鬆應對呢筆巨額留學費用，佢話阿囝張瞻今年已經17歲，所以已經儲好比阿囝留學嘅費用。佢話而家支付一個子女去留學，需要差唔多360萬港元，所以以阿Kay為例，佢有兩個小朋友，咁即係要支付720萬，絕對唔係一個小數目，一向懂得未雨綢繆嘅阿Kay，就喺小朋友出生前已經計劃好，等佢出生後就即刻買教育基金，果然係一名好有計劃嘅媽媽呀。
 
阿Kay嘅大仔話咁快明年就中學畢業，之後將會到外國升學，仲已經計劃定報讀關於運動科學嘅課程，阿Kay話報學校嘅過程，都需要一啲策略，所以都要面對唔少困難。

雖然小朋友適應力好強，不過阿Kay一諗到阿仔要去到咁遠獨立生活，阿仔未出發，阿Kay已經好唔捨得，因為一諗起放工返屋企見唔到阿仔已經好唔慣，再加上唔能夠同阿仔一齊過母親節或者生日，阿Kay諗到呢啲，已經覺得好心酸，不過佢話老公張繼聰喺呢方面就無佢咁緊張，佢話阿聰覺得阿仔需要出外闖下，學識撞下板先會成長，但對阿女佢就另一種態度，仲賣慘咁催眠阿女唔好出去留學，話爸爸唔想孤伶伶，認真搞笑。
 
徐榮大仔身處英國留學，不過佢都嚟聽取吓專業意見，計劃遲啲安排細女出國。徐榮仲分享阿仔最初到外國讀書時，都會成日打電話返屋企，但第二年就開始越嚟越少，第三年更變咗係父母要打電話去揾佢，徐榮話海外升學費用太貴，所以佢都要鞭策自己要努力揾錢。