香港婚後事｜羅子溢親揭姊弟戀真相 陳自瑤嚴肅談出軌話題

由陳自瑤(YoYo)、賴慰玲(Winki)、黎諾懿及羅天宇主持嘅全新綜藝節目《香港婚後事》將於今晚（25號）起，逢周四、五晚十點半於翡翠台播映。節目繼承劇集《婚後事》早前掀起嘅熱潮，由劇中四位主角將會化身主持，同嘉賓探討婚戀問題。而首集嘉賓就係男主角羅子溢！
阿賴講講吓話要返屋企搵老公，仲要怕怕醜醜咁，咩事？

子溢同老婆楊茜堯呢對相差五年嘅姊弟戀向來恩愛，諾懿喺節目亦向子溢單刀直入，邀請佢解構姊弟戀背後因由。子溢就話：「當時我覺得需要一個成熟嘅女人喺身邊，可以令自己成長得快啲，同埋搵到安全感。」雖然子溢都認有時會同太太冷戰，不過佢亦就話自己會以「第一時間讓步」處理爭拗，而太太嘅處理方法就係「瞓醒先算」:「我太太一遇到問題，會話唔好講住，等瞓醒先(處理)。」子溢喺節目分享相當獨特嘅湊女心得，希望女兒長大後可以成為硬淨嘅人。

子溢一嚟就失驚無神恭喜你，賴慰玲個樣勁驚訝。

子溢再捉住天宇玩驚嚇追問緋聞嘢，嚇到天宇眼都凸。現場完全係開 Party 嘅氛圍，天宇最後好勇敢咁答咗一個答案，令到現場再度起哄。

五位喺節目討論得最激烈嘅就係「肉體出軌」VS「精神出軌」話題！Yoyo 一聽到題目，即刻斬釘截鐵表示態度：「兩樣都唔得！」諾懿即反駁:「諗吓咋喎。」表情認真嚴厲嘅Yoyo向諾懿拋出兩條相當尖銳嘅情境題，分別為「如果你老婆同你一齊，佢不停諗緊第二個男人，你接唔接受到吖?」以及「如果你老婆出完軌一次返番嚟你度，你接唔接受到?」即成功令諾懿陷入苦思，並坦言確有一個狀況難以接受。之後 Yoyo 再追問諾懿：「如果佢鍾意咗另一個，佢之後返番嚟屋企，但個心都係飄走咗，咁又得唔得?」喺呢個緊張Moment，子溢企圖想一句解圍，不過就引起Winki勁大反應，並指子溢：「好殘忍!」但隨後Winki又表示，好怕有一日會認同子溢等人嘅睇法。

子溢好抵死咁講咗一句，逃唔出 Yoyo 嘅魔掌。 佢哋仲有討論到最好生幾多個小朋友嘅問題，都幾 inspiring。子溢又話想個女第時大個似媽咪，嘩！好冧呀。 之後佢連環以尖銳情境題向諾懿逼供，令到諾懿都一度陷入苦思。

而子溢唔只Talk得仲相當玩得，而佢嘅出招對象就係最怕醜又內向嘅天宇。事緣子溢一到場即追問天宇緋聞，嚇到天宇即時眼都凸埋，Yoyo 在旁食晒花生笑，諾懿就話：「嘉賓講嘢可以唔負責任呀。」之後全場起哄，天宇玩到全程「怕醜草」上身，面都紅埋。

Yoyo 話無論係「肉體出軌」或是「精神出軌」，對佢嚟講都係「唔得」！

《香港婚後事》逢周四、五晚十點半翡翠台播映