周國豐直播獲送生日驚喜 中一生當面評論兩位衰人

4月27號係 周國豐 54歲生日，喺26號晚佢同伍仲衡做直播節目，點知一班中一生 支嚳儀 李佳 顏志恒 林鉫徫 涂家堯 同 丁文俊 拎埋蛋糕，突然衝入直播室，為周國豐送上驚喜。不過由於伍Sir露出馬腳，令周國豐事前察覺到有古怪，但佢都話好驚喜同開心，兼且仲話有少少感動，因為佢嘅生日亦係《中年好聲音》一周年嘅日子。

至於送畀周國豐嘅蛋糕，當然係由呢方面嘅專家支嚳儀負責，但係佢就擺咗個大烏龍，因為佢聽到涂家堯相約呢次生日驚喜時，聽錯咗係為伍Sir慶生，到佢整好蛋糕之後，先被伍太發現及時改名，不過壽星仔都好大方哈哈大笑，仲分享自己嘅生日願望係身體健康。

難得成班人聚埋一齊，梗係要玩吓音樂唱吓歌，佢哋仲合唱伍Sir同周國豐之後合唱嘅《低分之王》，問到一班中一生有冇嬲過兩位評審衰人喺比賽中畀低分時，大家毫無忌諱當住伍Sir同周國豐面前講出感受，當中仲有人直認有唔開心。