音樂劇獲鍾楚紅等好友捧場 劉松仁謝幕落淚鞠躬答謝

相隔四年，由 王梓軒 同 陳潔儀 擔任男女主角、 劉松仁 任藝術總監嘅音樂劇《利瑪竇》第三度公演，前日(28號)上演尾場，一連八場公演吸引唔少圈中人前來欣賞，好似鍾楚紅、姜大衛同太太李琳琳、羅蘭、薛家燕、韓瑪莉同老公杜燕歌、陳友、譚玉瑛、黃浩然、朱晨麗、譚永浩以及杜小喬等。

松哥於演出當晚感動落淚

尾場演出完畢，男女主角 王梓軒 同 陳潔儀 率領眾演員謝幕，藝術總監 劉松仁 亦現身幕前，見到台上傾力演出同台下嘅支持，松哥感動落淚，先後向觀眾以及身後嘅眾人鞠躬致謝，佢話：「要多謝你哋，我希望喺《利瑪竇》呢條路上面，我哋尋覓到更多同類，攜手同氣，多謝你哋！」唔少觀眾企起身報以鼓掌鼓勵。

第三度演出嘅《利瑪竇》8場演出完滿完成今次演出仲吸引大批好友好似紅姑等捧場

慶功宴上，王梓軒同陳潔儀話三次公演共演出28場，呢個紀錄對於佢哋嚟講係好瘋狂，陳潔儀話：「呢刻嘅心情都有啲複雜，唔捨得亦係放鬆咗嘅，呢個劇其實都幾辛苦。」王梓軒再講：「呢次公演大家都成長咗少少，個故事入面講嘅嘢，我哋都明白多咗，所以有好多場口，我都唔使做戲，每次我見到佢嘅時候，自然就有個感受，每次佢摸我個頭，我就會即刻標眼水。」陳潔儀笑言拍梓軒有時候好似隻小貓。

Johnathan完成演出之後，仲話滿意表現，不過就非常唔捨得喇

佢哋再次感謝每位共同演出嘅演員，更特別感謝《利瑪竇》兩位主創——已故嘅恩保德神父同劉松仁，王梓軒話：「之前我唔敢擺自己落去個角色度，今次有好多我嘅元素喺入面，因為呢個係大家畀我嘅信心，潔儀畀我好多支持，真係好似小太陽咁。」陳潔儀搞笑捏佢面珠話：「佢係咪好得意呀？真係㗎。」