張家輝作品遠赴影展參賽 獲影迷大讚戲中特技出色

張家輝 執導兼主演新作《贖夢》，獲邀參與意大利烏甸尼遠東電影節競賽單元，星期二晚喺當地舉行世界首映。官仔骨骨嘅家輝抵達放映場地時，就獲得影迷夾道歡迎，當中有唔少係內地影迷，心情雀躍嘅家輝仲即場同佢哋交流同合照。對於作品首次公映，家輝話無特別緊張：「今次烏甸尼邀請我作為一個競賽電影，其實都係人哋畀面，人哋畀面我咪接咗人個面，自己野心唔係真係好大，當然如果能夠推廣到部電影，令大家多啲人知道呢部電影而有興趣入去支持，呢個係我最大嘅心願。」家輝又發揮搞笑本色，笑言能夠帶著《贖夢》來到意大利，希望都有個好意頭：「我作為導演帶住《贖夢》嚟到意大利，進行一個世界性嘅首映，咁...個意思咪就係大利囉，因為意大利吖嘛，總之希望大家睇得開心。」

放映前家輝先上台以英文答謝觀眾，又分享執導嘅原因，家輝指一直都非常欣賞7、80年代嘅香港電影，當中有唔少係驚慄片題材，希望透過自己作品，向全世界觀眾證明，香港仲能夠生產出唔同類型嘅電影。

放映完畢後，在場觀眾拍掌長達兩分鐘，令家輝非常感動。隨後超過半百影迷走到劇院大堂，圍著家輝要求簽名同合照，場面相當墟冚，家輝亦非常親民有求必應，足足逗留現場近半小時去滿足大家。有歐洲觀眾即場跟家輝交流，大讚電影擁有強烈風格，影像凌厲，有影迷就讚特技出色，被戲中驚悚場面嚇到。