陳貝兒將拍攝無窮之路第4輯 預計與團隊6月出發深度探索

陳貝兒出名(Janis)經常出埠工作，呢日現身一個旅行公司代言人簽約儀式，Janis好慶幸近年可以寓工作於旅行，拍攝節目四圍飛，令佢見識到世界各地唔同面貌景色，足跡幾乎走遍大半個地球。而因為工作關係，Janis至少有五年未去過旅行，佢都好想抽時間搞個家人旅行，爭取時間同屋企人相處。自己最渴望去嘅地方係到南極睇企鵝，未來希望可以繼續放眼世界，探索更多不同地方。

Janis主持既《無窮之路》系列一直以來深受觀眾歡迎，不斷有消息傳出會拍新一輯，呢日Janis終於露口風，透露團隊正密鑼緊鼓籌備開拍第4輯：「就快起程，我都打聽緊會去邊，聽聞越去越遠，我都好期待，估計6月會出發，連續拍攝兩個月。」每次出外拍節目Janis都要做好多準備，心情往往處於抗奮又高度關注狀態，去到邊都會金晴火眼，所以佢都好期待出發。

現年44歲嘅Janis近年事業得意，發展大家有目共睹，但愛情方面就暫時未有著落，但佢仍然抱樂觀態度，仲話女性要拍拖一定有時間，只係佢冇對象，驛馬星動不斷，桃花未有風吹草動，但自己都唔係宅在家中，有出去世界各地碰緣份。