張馳豪《Dirty Rhythm》騷肌玩性感 拍MV前靠三種食物地獄式減肥

張馳豪(Aska)日前作客電台節目，宣傳今年第一首派台歌《Dirty Rhythm》，今次新歌Aska一改斯文怕醜仔形象，曲風180度大反轉改玩性感，Aska話新一年為自己定下嘅新目標，就係要推出唔同種類嘅歌曲，等歌迷睇到佢嘅各種潛質。

張馳豪日前作客電台節目，宣傳今年第一首派台歌《Dirty Rhythm》。

Aska形容自己本身手腳唔協調，最唔擅長就係快歌同跳舞，今次拍新歌MV仲要做出唔少性感誘人嘅舞步同表情，壓力之大可想而知。Aska用咗差唔多一個月時間特訓跳舞兼操肌：「老實講第一日上堂時排舞師跳咗Chorus(副歌)部份畀我睇，我真係O咗嘴！」Aska講笑話嗰一刻真係有啲後悔點解要改變曲風。

Aska話新一年為自己定下嘅新目標，就係要推出唔同種類嘅歌曲。

為咗操出fit爆身型，Aska嚴格控制飲食，曾經試過去外地工作時，成枱人食緊當地美食，Aska拎個柑出嚟自己食生果！拍攝前兩個星期更加地獄，「嗰段時間淨係食菜，通常係西蘭花、雞肉，通常係雞胸，雞脾都得，但唔食皮，跟住就係蕃薯，主要係呢3樣嘢，一日3餐全部係呢啲嘢！」Aska又指正式拍攝前幾日，為咗「收水」，連飲水量都要控制。