神耆小子｜Kent哥被綁Archie收錢代查真兇 與阿蕭爆肚對罵啜核笑到肚痛

新劇《神耆小子》噚晚播出第2集，錢大海(鄭則士 飾)被綁架後因交通意外而僥倖脫險，之後又以100萬利誘路過現場嘅趙一鳴( 冼靖峰  飾) 協助調查家人係咪如兩名綁匪所言，係策劃事件嘅真兇。

經過一輪討價還價之後，最終以158萬達成協議，一鳴帶大海返屋企，製造大海失蹤假象以便查出真相。豈料一鳴爸爸趙子勇( 蕭正楠 飾)原來與大海早有積怨，子勇懷疑大海係當年指使人打斷自己手腳嘅幕後黑手，雙方一見面即爆發激烈衝突。另一邊廂，大海情人洪玫瑰( 樊亦敏 飾)同兒子繼來( 曹永廉 飾)喺綁架事件中均相當有可疑。

Kent哥扮演嘅錢大海被綁架脫險，仲估計主使嘅就係自己家人

第2集內容雖然以查案為主，不過爆笑點就非常多，無論係Archie同Kent哥之間嘅一唱一和，定係Edwin、Archie同Kent哥嘅舌戰對壘都火花十足。演戲新丁Archie喜劇節奏亦令人另眼相相看，佢夾喺Kent哥同Edwin之間進行談判嘅場面，就不時以主持式口脗猛話：「咁你有咩回應？」、「冷靜啲呢位先生」等對白；加上Edwin誇張豐富嘅搞笑嬲怒表情，仲有Kent哥句句有骨嘅互寸對白：「正所謂仙女下凡塵，點可以搵個普通人，仲要係個流氓」、 「咩叫有啲乞人憎，係非常乞人憎」等，大大增加可觀性，難怪唔少觀眾都讚新劇夠晒搞笑，亦大讚 Archie演繹相當自然。

Archie收留Kent哥，點知原來老竇Edwin同佢有血海深仇

Edwin同Archie今次飾演兩父子亦成為話題，觀眾仲分為支持同反對兩派，支持派認為以阿蕭真實年齡，絕對能勝任飾演Archie父親；而反對派就普遍認為Edwin保養得宜，同Archie雖有「父子相」，不過似兄弟多過似父子喇。

夾喺中間嘅Archie就要充當和事佬一職，而佢同Edwin就被觀眾指似兄弟多過父子喇

而《神耆小子》對白夠晒啜核貼地，除咗有賴編劇功力，唔少仲係主角Kent哥嘅爆肚功勞。Edwin受訪時坦言同Kent哥對戲雖然好玩，不過就一秒都唔可以鬆懈：「熟讀劇本係首要，但係腦筋都要轉得快，因為好多對白Kent哥都會用自己嘅方式去演繹，唔一定完全同劇本一樣。加上我同Kent哥劇入面係冤家，好多時大家會度啲啜核嘢去鬧對方同糟質對方，成件事感覺好似邊拍戲邊玩，都好開心。」

呢幕咬耳仔傾調查進度戲，真係笑到肚痛

另一場Archie同Kent哥咬耳仔討論調查進度嘅場面亦搞笑十足，兩人唔止連環咬足6轉耳仔，仲幾乎「面貼面」，加上Kent哥同Archi 一個若無奇事、一 個尷尬無比，劇情令人捧腹。而Archie受訪時亦指呢場戲相當難忘：「 Ken 哥想做到一sho 落嘅效果，但我第一日唔係好get到應該點演，所以我哋最後都要分shot拍。之後因為拍唔到想要嘅效果唔太開心，好彩後尾因為under咗有機會補拍，我哋10分鐘內搞掂咗個一shot落，仲係兩次就搞掂咗。雖然隔咗成3日先再拍，但我哋竟然都冇唔記得對白，呢件事真係好有滿足感。」

《神耆小子》星期一至五晚 21:30 翡翠台