【家事常識/煲湯/烹飪技巧/廚房小貼士】老人家成日話老火湯煲出湯料精華，多飲有營養又有益健康，但原來煲老火湯做錯一事會弄巧反絀！湯煲太耐反而會「越煲越傷腎」！湯內嘌呤、鉀、脂肪及重金屬會隨時間溶出，尤其對腎臟負擔大。飲湯無非想健康，本文整理蔬菜湯、魚湯、雞湯、骨湯同中藥湯的最佳煲煮時間，教你正確煲湯方法。
老火湯都係「精華」？未必啱你身體
坊間常話「老火湯好補」，但其實湯水只係煲得耐，不代表營養愈多。
長時間高溫煮到2、3小時以上，維他命、氨基酸等會被破壞，反而肉類釋出的嘌呤、脂肪、鉀同少量重金屬會溶入湯中，增加痛風、腎臟及心血管風險。
建議：
一般家庭湯水，不建議天天煲、每日飲，尤其是「大骨湯」、「老火肉湯」。
已有高尿酸、腎病、高血壓、肥胖人士，更應控制飲湯量及煲煮時間。
蔬菜湯：快滾即飲，保留維他命
蔬菜湯屬於「滾湯」，煲煮時間愈短，維他命流失愈少，湯亦較清爽。
研究建議蔬菜湯或素高湯（包括菌湯），一般只需 20–40分鐘，蔬菜入煲後不宜久煮，否則會變爛、變黃，營養亦會大減。
烹煮貼士：
- 先用瘦肉或瑤柱滾湯底，再加蔬菜或菌類，約煲 15–20分鐘 就可以落。
- 避免蔬菜煲足一、兩小時，會令湯水變濁、營養流失，同時口感偏苦。
魚湯：30–45分鐘，鮮味足又唔「高嘌呤」
魚湯屬「海鮮湯」一類，只要烹調時間適中，味道已經相當鮮甜。
不少專家及營養師建議，一般魚湯約 30–45分鐘 已足夠，再煲長會令魚肉變柴、湯變濁，同時嘌呤含量上升。
健康煮法：
- 魚煎一煎再加水，可令湯色乳白，但不代表更營養，只是脂肪乳化效果。
- 避免大火滾足兩個鐘，只會提升嘌呤、脂肪，不利痛風及腎臟人士。
雞湯／海鮮湯：1–1.5小時，營養黃金期
雞湯、海鮮湯通常用雞肉、雞翼、蝦頭、干貝等做湯底，味道層次較多，但煲太久一樣會「由補變害」。
一般建議熬煮時間約 1–1.5小時，已經足夠讓膠質、氨基酸釋出，味道香濃，營養亦維持在較高水平。
小心注意：
- 超過兩小時，嘌呤、脂肪、鉀會持續溶出，對腎臟及心血管負擔較大。
- 可以搭配淮山、枸杞、紅棗、蓮子等藥膳材料，增加香味又毋需煲足三、四小時。
骨湯（牛骨／豬骨）：1.5–2小時已足夠
牛骨、豬骨湯常被視為「補骨」、「強筋健骨」湯水，但其實骨頭長時間煲煮，會令骨內的重金屬、脂肪、嘌呤溶入湯中。
綜合多個營養及健康資訊，建議牛骨、豬骨湯煲煮時間約 1.5–2小時，味道已較濃郁，營養亦較理想。
風險提示：
- 若煲超過3小時或加醋長時間煲，骨頭結構崩解，會增加重金屬（如鉛、鎘）溶出風險，對腎臟、大腦有潛在風險。
- 建議可加入紅蘿蔔、玉米、南北杏等，可稍減油膩感，同時增加蔬菜營養。
藥材湯：約40分鐘，唔使「煲到天光」
中藥湯一般係以藥材（如花膠、人蔘、天麻、川弓等隔水燉）煎煮，目的係提取藥效，而非煲到湯水變濃濁。
有中醫及營養資訊指出，一般中藥湯（唔係極長時間燉煮嘅燉湯）約 40分鐘 已可釋出大部分有效成分，再煲長不但浪费時間，仲會令藥性改變或苦味大增。
小貼士：
- 若係「燉湯」（如花膠、人蔘、天麻、川弓等隔水燉），可用燉盅猛火燉約 2–3小時，因湯水集中在盅內，養分較集中。
- 煲煮前最好先咨詢中醫師，按體質配藥，同時控制煲煮時間，避免長期過量飲用。
煲湯黃金法則
- 肉類、骨頭湯：控制在 1–2小時 內，避免長時間煲。
- 多用瘦肉、魚、蔬菜、菌菇入湯，減少肥肉、內臟、大骨比例。
- 腎臟或痛風病人，應諮詢醫生／營養師，決定是否飲湯及飲多少。
【延伸閱讀】
家事常識｜急凍肉可放幾耐？反覆解凍會致癌？免治肉最易出事 一文睇清各款凍肉貯存期限
家事常識｜翻煲水會致癌？中疾控實測揭真相 化學博士K Kwong拆解電水煲致癌原因
家事常識｜用氣炸鍋煮食會致癌嗎？8大氣炸鍋煮食安全貼士 原來避免一食材＋做啱一程序就解決！