陳豪、袁偉豪主持的全新飲食節目《豪遊咖啡》，「探啡」之路去到尖沙咀，阿Mo化身「一日店長」﹐為大家介紹自家品牌Marshmallow Latte和Tiramisu Latte，親手認真製作表情非常Man！之後，「雙豪」會合，去到一間以紐西蘭為主題的生活咖啡店，當中的Irish Coffee，令阿Mo勾起澳洲讀書回憶。另外，Ben又會見識藝術打印咖啡、去到希臘風打卡Café，一嚐2020年榮獲「澳洲國際咖啡金獎」的咖啡豆炮製而成的Latte，味道略帶花香。
Ben聯同今集嘉賓黃翠如邊食邊傾，翠如笑言同Ben合作拍攝《使徒行者2》時，因對方而「跳出」早餐框框：「喺內地工作時間長又凍，所以好需要一杯能量飲品，係你令我覺得咖啡有種安慰感覺。」翠如還嘗試拉花，更自誇成品是一幅風景畫！
阿Mo在節目自爆拍劇期間會喺錄影廠「開檔」，供應私伙咖啡，還憶述帶埋磨豆機在現場手沖咖啡請劇組品嚐：「嗰時磨豆嘈到幕後大嗌『靜啲好冇呀？！』，後來因為唔想阻到拍攝進度，我就擺咗部三公升咖啡機喺度， 見到人哋飲咖啡咁開心，係遠勝自己飲咖啡嘅感覺。」
至於Ben愛鑽研咖啡之餘，眾所周知他是鐵騎發燒友，不過自兩年前「升呢」人夫後就大為改變：「可能結咗婚關係，我開始鍾意靜態啲嘅興趣，例如經常去百貨公司家品部睇砂煲罌罉，當然望住架電單車好靚、抹吓佢都好爽，但都唔及拎住個好好用嘅煎Pan煮一餐好好味嘅飯餸。」
