10月9日「滙豐將恒生銀行私有化」成為財經焦點，Threads、群組內都有不少人對「恒生私有化」有誤會，擔心會影響存款安全、甚至誤以為滙豐要撤資離場。財金KOL千頌C（原文按此連結）就出文深入淺出解釋「恒生私有化」到底是怎樣的一回事，並回答存戶最關心嘅問題，最後更溫馨提示大家要提醒屋企長者提防以「恒生私有化」為藉口嘅詐騙。
千頌C解釋恒生銀行私有化
Q1：恒生私有化係咩嚟？會唔會影響我啲存款？
千頌C：唔會影響！
🔹 所謂「恒生銀行私有化」，其實即係母公司滙豐以現金收購全部恒生股份，令恒生喺聯交所退市，唔再公開買賣股票。
🔹 呢個改動只係股權層面嘅事，唔會影響你嘅戶口、存款、信用卡、投資戶口。
🔹 恒生依然係獨立持牌銀行，有自己品牌🏦、產品同分行，戶口一樣照用冇問題！
Q2：滙豐買返恒生，係撤資定投資？
千頌C：係投資，唔係撤資！
🔹 滙豐會斥資超過1,061億港元收購恒生餘下股份，屬於實質投資動作。
🔹 滙豐目前持有約63%恒生股份，完成後將全資擁有恒生。
🔹 簡單講：滙豐係「帶仔返屋企」，方便兩個品牌日後整合發展，加強科技同AI創新實力⚙️。
Q3：持有恒生股票嘅股民點算？
千頌C：會有現金套現機會！
🔹 等股東大會通過私有化方案後，恒生股份會以每股$155作價被回購，另外再加上第三期股息（金額將稍後公佈）。
🔹 換言之，股東可直接收到現金套現。
🔹 而$155呢個價，已係恒生自2019年後首次觸及，屬於合理水平👍。
🧾 Q4：恒生退市會唔會「收埋數」唔交代？
千頌C：唔會！
🔹 雖然退市後恒生唔使再向聯交所披露財報，但佢母公司**滙豐（5號仔）**仍然係上市公司。
🔹 所以恒生嘅財務狀況、貸款風險、業務表現等，都會載入滙豐嘅公開財報入面，透明度依然受監管
提防騙徒藉「恒生私有化」詐騙長者！
千頌C特別提醒，恒生私有化消息好可能畀騙徒用嚟行騙。
【例如】：有人致電話長者：「我係恒生職員呀，你睇新聞啦，我哋要私有化，你啲錢要快啲轉走啦！」
呢啲電話📞百分百係詐騙！
⚠️ 綜合千頌C意見，記得告知長者以下重點，避免被騙徒誤導。⚠️
「恒生私有化係股權變動，存款唔受影響！」「恒生私有化係股權變動，存款唔受影響！」
【延伸閱讀】
10月港元定期存款｜銀行18厘高息搶客 $100起開戶 20個精選戶口高息回報5厘至12厘
唱YEN攻略｜日圓跌穿5.2找換店驚現5.17好價!17間銀行+10間找換店日圓兌換價一覽