【重男輕女/公屋/單位/單身/樓價】一名男網民早前在「香港討論區」發帖，指妻子父母當年以20萬元購入黃大仙一個公屋單位，已入住30年。他指兩夫婦數年前結婚後買樓，妻子便遷出公屋和除名。
父母表明公屋單位留未婚兒子
最近事主外父、外母表明他們百年歸老後，會把單位留給未婚兒子，令其妻感到不滿，「我老婆覺得兩老在世，當然就繼續由佢哋3個人一齊住。但如果兩老離世後，應該分咗間屋先公平，就算唔賣層樓，佢細佬想繼續住，都應該由佢補償番一半的樓價畀我老婆」。
然而兩老認為女兒已出嫁獨立，應由夫家照顧，加上二人已買樓，並無住屋需要，惟他指「我哋層樓幾年前買負緊資產，其實帳面上冇幾多錢剩，住私樓唔一定好條件過佢哋」。
事主兩夫婦強調並非「謀層樓」或貪圖金錢，僅不滿兩老重男輕女，又指舅仔平日游手好閒，工作做不長，「人生冇慾望，冇打算拍拖、結婚」。
每月交5,000元家用
至於事主妻子結婚生育後，仍有每月交5,000元家用，又安排父親看私家醫生，自問做足女兒責任，其妻直言如單位將來歸弟弟擁有，以後父母的事就交由弟弟處理，事主為此詢問網民意見：
「外嫁女冇屋分？外嫁女不配有家族資產。如果我老婆想要番半層樓，請教吓各位應該要點處理？業主應該係我外父、外母，所以如果行法律應該子女平分，除非有遺囑。」
網民：謀住間屋 VS 同細佬傾吓
帖文曝光後，有網民指摘事主兩夫婦貪圖單位，亦有人著他們跟舅仔商討，「咁樣謀住人哋間屋，兩老如果立晒遺囑只畀個仔，你搵律師告都冇用」、「你哋買咗私樓，而家又謀住人哋間公屋一半業權的錢，真係好賤。你覺得兩老會用咩眼光去睇你呢個女婿？佢哋會點諗自己個女？」、「公屋你老婆除咗名，真係已經唔關佢事，講錢傷感情，反正點都係傷，直接你同老婆一齊同佢父母講出來分錢囉」、「當初除名就預咗唔分錢啦」、「或者同佢細佬傾吓肯唔肯分一半畀你老婆」、「視乎有冇遺囑，有就跟遺囑，冇就跟法律」。
【延伸閱讀】