樓價160萬，呎價計落只係HK$6,061呎，港鐵站喺正樓下，10步之內入港鐵出入口，聽落係咪覺得係一個筍盤呢？咪住，聽晒先斷定呢個盤值唔值得入手啦！
超近筲箕灣站｜48年樓齡《金來大廈》拍賣樓盤
今次主角來自環亞物業拍賣行，將於1月13日拍賣嘅物業，位於筲箕灣嘅金來大廈高層F室單位，實用面積264平方呎嘅兩房單位。呢個單位原本都有放上地產代理公司出售，叫價250萬。不過今次受到法院令及業主命被公開拍賣，拍賣嘅底價為160萬港元，比叫價折讓3成6，平均呎價只係HK$6,060.6。
參考返近期成交嘅數據，上年年中有一間17樓A室，實用面積282平方呎單位以280萬成功出售，平均呎價HK$9,929﹐比今次拍賣叫價嘅平均呎價高出3成9。
先同大家講講佢嘅優點，呢個單位位於筲箕灣站B2出口旁透，由單位去港鐵站幾乎全程有瓦遮頂。樓下周邊有大量民生小店，包括食肆、寵物店、雜貨店、理髮店等。另外，單位位處高層，主要窗戶向東南面，望向鯉魚門公園嘅西灣山，算有開揚嘅景觀。
至於缺點，從拍賣行提供嘅相片見到，全屋嘅房間、廚房、浴室都陳舊污糟，新買家絕對需要預備一筆資金進行全屋裝修，例如地板重造、更換全屋水喉、電線、冷氣機、浴室設備等，預計額外資金要準備40至50萬。另外，呢棟大廈樓齡已經達48年，所以裡裡外外都非常陳舊，未來有機會需要集資進行大廈維修。
金來大廈17字樓F室
📍 物業地點：筲箕灣杜雲里2-12號及筲箕灣東大街42-52號
🏘️ 物業面積：264平方呎
📏 平均呎價：$6,060.6港元
💰 拍賣開價：160萬港元
📅 拍賣日期：1月13日（星期二）下午3時
✍🏻 物業編號：00019140
🔑 拍賣地點：尖沙咀彌敦道222號恆豐酒店2樓宴會廳
延伸閱讀
香港樓市｜2025二手樓成交之王揭曉！日出康城錄645宗稱冠 荃灣一樓盤交投急升4成 熱點屋苑分析