一間擁有53年樓齡嘅物業，實用面積只得220平方呎，但叫價去到255萬，一啲都唔平，究竟佢嘅吸引力係咩？
由拍賣行「環亞物業」於下月3日推出嘅其中一個拍賣盤，位於港島西灣河街嘅長興大樓頂層連天台單位。大廈本身於1973年入伙，距離至今已經有53年歷史。雖然年紀大，但室內裝修一啲都唔殘，亦都正正係呢個單位嘅吸引之處。
單位嘅室內面積達220平方呎，本身係屬於梗房單位。同時樓契仲包括埋一個約164平方呎嘅天台空間。上手業主於2020年10月，以338萬購入單位。當時香港樓市正值升勢，但業主都可以令前業主2萬元蝕讓，當然係有佢嘅原因，估計當時物業嘅狀態太差，需要全屋大翻新，所以未能喺轉售時獲利。
上手業主買入時，已經將全間屋重新裝修，房間間隔統統打通，客廳同主人房以一個到頂嘅櫃去分隔，而客廳嘅另一邊係開廚及浴室，而地板、大門都換過，換上電子門鎖，所以全屋都唔覺有陳舊嘅感覺。
單位座向西南面，望向西灣河街一帶嘅樓景。房間窗口向西北，由於附近都係舊樓、甚至係已拆卸嘅地盤，所以房間嘅景觀會較好。另外，天台空間亦都進行過修葺，周圍換上木製圍欄，感覺簡約。
今次拍賣單位嘅起始價為255萬港元，雖然唔算平，計落如果以呢個價成交，平均呎價都要HK$11,591，但唔需要重新裝修已經慳一筆，又或者可以變相當做「貴樓價連裝修」放入按揭去供款，所以對於一班既無錢裝修舊樓，又無錢直接買新樓嘅朋友，有一定嘅吸引力。
長興大樓20字樓A室連天台
📍 物業地點：西灣河街110號
🏘️ 物業面積：220平方呎+164平方呎天台
📏 平均呎價：$11,591港元
💰 拍賣開價：255萬港元
📅 拍賣日期：3月3日（星期三）下午3時
✍🏻 物業編號：00019209
🔑 拍賣地點：尖沙咀彌敦道222號恆豐酒店2樓宴會廳
延伸閱讀
租置計劃重推有望？預計市價二折上車 何永賢：研未來10年供應29萬單位 即睇全港39條租置屋邨名單