180萬港幣就可以享有近千平方呎嘅空間，仲要係市區盤？當然呢個盤並非一般嘅單位，而係位於牛頭角嘅銀主盤，將於下月初拍賣，立即同大家睇睇。
逾60年樓齡｜牛頭角銀主盤180萬拍賣
於1965年落成嘅牛頭角多喜大廈，樓高12層，一層有14伙，分別以A至N室代表。而今次主角位於3樓H室兩房單位。據拍賣行忠誠集團透露資料顯示，單位嘅室內面積達336平方呎，再加外接一個623平方呎嘅平台。單位將會喺5月6號進行拍賣，拍賣嘅起始價為180萬。據網上資料顯示，上手業主於2010年以200萬買入單位，帳面輕輕蝕讓一成。
物業樓齡雖然足足有61年，但單位嘅內裝其實未算好差，從拍賣行實地拍攝嘅相片睇到，單位嘅天花未見有滲水剝落嘅情況，只係牆身、地板比較舊，而廚房同廁所嘅狀態就相對再差少少。狀態最差嘅，應該就係外面達623平方呎嘅平台，現時擺放咗好多花盤、膠桶及雜物。如果新買家入手後想大執單位，相信至少都要預留50萬或以上嘅預算，或者如果買家識DIY裝修，就可以再慳多少少。
大家咪以為呢個平台無乜用，其實平台嘅環境都幾開揚，同附近樓宇嘅距離未算好大壓逼感。小編手痕幫大家AI設計一番，將平台設計幾個不同風格，變成一個幾Chill嘅休息空間，有興趣嘅朋友不妨參加一下。
牛頭角多喜大廈3字樓H單位連平台
📍 物業地點：牛頭角定富街17號
🏘️ 物業面積：336平方呎＋623平方呎平台
📏 平均呎價：$5,357.1港元
💰 拍賣開價：180萬港元
📅 拍賣日期：5月6日（星期三）下午3時
✍🏻 物業編號：26050610
🔑 拍賣地點：中環德輔道中84-86號章記大廈３樓Ａ室
延伸閱讀
公屋都有龍床盤？天水圍天恩邨88呎迷你單位 細過車位/劏房？一原因拒絕不計編配機會！