除夕煙花倒數2025｜官方發佈：最佳觀賞地點＋時間流程

艱辛嘅2024年即將過去，相信大家都好想透過一場轟烈嘅除夕煙花倒數匯演，迎接2025新一年嘅來臨。今年除夕煙花嘅安排已經公佈，並且官方列出8個最佳煙花觀賞位置，以及到時煙花發放嘅時間，立即同大家懶人包！

維港燦爛煙花 爆發12分鐘

踏入2025年一刻（即00:00），喺維港上空爆發除夕煙花Show，整個Show歷時12分鐘，煙花闊度達1,300米。官方公佈，維港兩岸有8個最佳觀賞地區，不單只上空較少樓宇阻礙，現場更配備音響設備播放主題音樂「幸福樂章」，配合煙花效果。

A.中環海濱
B.金紫荊廣場
C.灣仔臨時海濱花園
D.東岸公園主題區
E.香港文化中心露天廣場
F.尖沙咀海濱花園
G.星光大道
H.西九龍文化區

根據過往經驗，A、B、C、E、F、G呢6區一般都有好多有心人，晨早清晨開始已經嚟到較前位置霸位，以拍攝捕捉煙花發放嘅燦爛場面。如果大家下午過後先到的話，相信東岸公園主題區及西九文化區會相對大機會有位置。

時間流程｜晚上6點開始實施封路

一如以往，警方預計會由當日晚上6點開始，逐步將維港兩岸相關路段實施封路措施，以配合人群管制，所以預計6點後相關地方嘅路面及公共交通工具路線都會受到影響，建議大家出發前參考及瀏覽運輸署網頁或「香港出行易」流動應用程式。因此，屆時相關觀賞地點較近嘅公共交通工具上落客位置，均會隨時間而改變，大家要保持留意官方公佈及預留時間前往。

煙花匯演｜七彩祥雲維港盛放

旅發局表示，今次除夕煙花匯演嘅重頭戲，係安排咗糅合七色彩煙同銀閃煙花嘅「七彩祥雲」首次喺香港展示，效果包含咗紅、綠、黃、藍、紫及橙色嘅彩煙。而另一大亮點係「繁花盛放」，採用經特別調配嘅顏色，包括藍、粉紅、檸檬黃同橙色等，將五層煙花同一時間喺不同高度爆破，就似鮮花綻放，喜迎新一年。