購物中心玻璃門，向來係「隱形殺手」，唔少人都試過「撞個正着」。近日東薈城就上演一幕「真人騎呢劇場」，一位操鄉音的阿嬸疑似未察覺店舖已關門，硬生生撞上玻璃門，之後更當場發嬲，質問店員：「點解唔掛個牌話Close？」。
鄉音阿嬸做「盲毛」撞玻璃門遷怒店員
根據影片顯示，事發於東涌東薈城某間時裝店門外。當時店舖已關門，唯玻璃門未貼任何「關門」或「暫停營業」標示。一位身穿黑色上衣、手拎購物袋的阿嬸，步伐堅定地直衝門口，結果疑察覺店舖已關門，不慎做「盲毛」撞正玻璃門。
阿嬸其後操不縐正廣東話向店員爆Seed：「點解唔掛個牌話Close？我點知你關咗門呀！」，店員亦對阿嬸表示抱歉，指已跟足公司指引處理關門開門，又表示會再幫阿嬸向公司反映事件，惟未有收火，繼續大吵店內。最後影片完結。
網民反應：笑爆嘴
影片一出即引起網民熱議，笑爆留言區，不少人指阿嬸「好難頂」，更形容服務業難做，「阿嬸：我唔係撞門，我係撞咗個社會冷漠。」、「玻璃門：我只係想靜靜地做個透明人，點知畀人當成敵人。」、「我掛咗個牌，叫『你自己睇路』。」、「阿嬸應該申請玻璃門賠償，理由係『精神受創』。」；亦有網民發揮創意，將事件升華為哲學層次：「人生就好似玻璃門，以為通得過，其實早已關上。」