近日，一名市民在社交平台分享「長沙灣佳寶超市員工蛇王瞓覺」的照片，引來大量圍觀與熱議。當大家以為有人偷懶時，近鏡揭曉真相：原來「員工」係一隻頸圈印有「佳寶超市」字樣的貓店長。事件迅速成為網民打卡話題，甚至有人笑指「呢位員工人工好高，戴住大金鏈」。
事主在社交平台發文，以半責怪語氣寫道：「長沙灣佳寶，你哋啲職員返工時間喺舖頭出面蛇王訓覺都得㗎咩？」並附上多張照片，顯示一隻貓在超市門外躺平瞓覺，最後一張近鏡揭示真相：貓頸圈印有「佳寶超市」字樣，身份曝光後，網民紛紛留言：「貓店長嘅合理態度」、「成日見到佢訓死咗」、「夏天就入番去瞓」。
眼利網民發現大金鏈
更有眼利網民發現頸圈下方掛住一條大金鏈，笑言：「呢位員工睇落好高人工喎，買得起大金鏈」。
不少網民留言表示，自己曾遇過同一隻貓，並分享舊照：「22年開始由細睇到佢地兩隻大」。有人更形容牠「係長沙灣地標」，每次經過都忍唔住影低。事件令「貓店長」成為社交平台熱話，甚至有人提議「佳寶應該幫佢開 IG」。
