冼靖峰羅毓儀組CP有新鮮感 為劇集《神耆小子》錄插曲感壓力

新劇《神耆小子》播出以嚟受觀眾熱捧，劇集亦有不同插曲登場，冼靖峰(Archie)同羅毓儀(Yuki)喺劇中呢對CP好有新鮮感，近日劇情講到兩人對彼此萌生愛意，咁啱兩位都係唱得之人，佢哋就趁機合作翻唱《難得有情人》。

由於Archie同Yuki各自各忙，最初需要分開錄音，大家都feel到未夠完美，好彩最終都把握機會合體合唱，Yuki更率先爆喺劇中佢哋會有好多甜蜜溫馨場口。

喺錄音及拍攝時，兩人各自投入方法，Archie話觀眾睇到嘅畫面係有晒音樂，但佢哋真實拍攝時並無音樂做背景，要憑空想像去墮入情境。畢竟歌曲都係一首經典，Archie心明一定會被人比較，而存在一定壓力，但謙卑嘅佢事前做足功課，務求效果達到最完美，有信心可以帶出新鮮感畀觀眾。Yuki亦覺得一首獨唱歌變合唱歌，預咗有不同聲音，但同樣可以令人有煥然一新嘅感覺。