神耆小子｜已故陳狄克現身留搞笑回憶 羅毓儀爆Archie食量嚇壞人

星期五晚播出《神耆小子》第5集，講述錢大海( 鄭則士 飾)為保護孫女金多多( 羅毓儀 飾)「重現人間」，並接受警方調查。雖然警方一再強調綁架事件同大海家人包括細錢生( 曹永廉 飾)仲有情人知己洪玫瑰無關，不過大海仍抱極度懷疑，加上大海返屋企後為小事爭吵不停，大海決意繼續調查，更命令老臣子佳叔( 陳榮峻 飾)同一鳴( 冼靖峰 飾)協助。

而理念不同由朝到晚鬥嘴嘅一鳴同多多，噚晚一集突然過電，而分手多年嘅有方( 傅嘉莉 飾)同子勇( 蕭正楠 飾)亦正式重遇。呢集焦點，落在已故知名綠葉藝人陳狄克嘅精淒演出。飾演大海寓所盡責看更老陳嘅陳狄克，向曾遭綁架嘅大海拍心口話：「我以前係散打王， 十個八個都埋唔到我身！」

陳狄克喺《神耆小子》飾演看更老陳，仲大耍功夫要保護Kent哥

說畢仲即時耍起功夫，而搞笑嘅係，雖然陳狄克全程Show Off相當陶醉，不過鄭則士就未有放在眼內，只自顧自同佳叔講電話，畫面趣怪。雖然對老陳耍功夫毫無興趣，不過大海臨走都不忘大讚老陳耍功夫有 「拳風」，令老陳繼續陶醉咁對住空氣大顯身手，喜感十足。

其實陳狄克16歲已加入電視圈從事武指工作，更曾為經典劇集《上海灘》擔任武指， 周潤發扮演嘅許文強被亂槍射殺嘅經典一幕就出自佢嘅精心設計。如今能在劇集中見到陳狄克獻身手，更要搞笑為主，可謂別具意義。

劇中Yuki亦大個女唔再係中學生已經大學畢業喇

而自第3集後佔戲頗重嘅羅毓儀(Yuki)，呢集除咗同Archie「偽深情」互動同唱K戲份外，其中一幕劇組仲為觀眾呈現Yuki「大學生畢業look」。由「御用中學生」升呢成大學生嘅Yuki，照片中睇嚟比平時成熟，更有觀眾指佢似足8、90年代「宅男女神」葉蘊儀嘅影子。

佢同Archie呢對歡喜冤家拍攝仲成日鬥嘴

觀眾亦大讚Yuki喺《神耆小子》中wet妹look一改以往形象之餘，亦讚佢唱《難得有情人》時﹐亦有少許原唱關淑怡嘅味道。至於今次同Archie合作，Yuki就坦言開心又有新鮮感：「因為大家都鍾意音樂，所以除咗拍劇，我哋都會交流一啲拍劇同埋唱歌嘅心得，互相學習。」

Archie仲被Yuki大爆食量驚人

佢又笑指同Archie戲內戲外都經常鬥氣，仲大爆Archie原來好大食：「拍劇時我哋都好鍾意鬥嚟鬥去，喺度計住大家邊個NG得多啲。最搞笑嘅係我發現咗佢原來好大食，有一次去餐廳放飯，佢嗌咗成枱餸之後，仲食咗一隻海南雞，同台嘅人都畀佢嚇親。」

分手多年嘅蕭正楠同傅嘉莉亦都正式重遇