薛家燕與四位視帝赴新加坡登台 寶貝孫Julian隨行上台合唱

薛家燕（家燕姐）呢日現身一個活動，與老友記預祝母親節，家燕姐分享保健資訊，提醒大家打疫苗，更即場獻唱《皆大歡喜》傳遞歡樂氣氛。

家燕姐參與呢個活動覺得好有親切感，因為有啲老友記係睇住佢長大、有啲老友記就同佢一齊長大，家燕姐指喺香港好少喺酒樓唱歌，為咗令老友記開心，家燕姐特別為佢哋唱咗首歌，同時分享健康知識，因為長者健康就一家人都快樂。

家燕姐與四位視帝羅嘉良、馬德鐘、黎耀祥及陳展鵬出埠前往新加坡登台，佢嘅家人同寶貝孫Julian亦隨行，順道一齊玩吓兼慶祝母親節，家燕姐又笑指寶貝孫Julian將上台合唱，家燕姐一向忙過不停，坦言永不言休，自覺有使命娛樂大家！