神耆小子丨樊亦敏挑戰性感露臂影床照 魯振順拍天台講數場口靠食正氣丸

TVB熱播新劇《神耆小子》噚晚播出第6集揭開唔少謎團，原來當年搵人打跛趙子勇（蕭正楠飾）嘅幕後黑手並非錢大海（鄭則士 Kent 哥飾），而係錢有方（傅嘉莉飾）前夫。趙一鳴（冼靖峰飾）同多多（羅毓儀飾）分別被揭出唔係子勇同繼來（曹永廉飾）嘅親生仔女，前者係子勇離世哥哥嘅仔、後者係繼來前妻出軌司機後所生，而焦點場口就落喺聶鎮江（魯振順飾）使計陷害繼來同大海嘅劇情上。

魯振順炎夏着 Mark 哥褸拍劇靠食「藿香正氣 片」頂住。

同繼來反面嘅聶總，為咗將自己利益，竟然以50萬港元企圖勾結阿Jack（吳子冲飾）影低同大海紅顏知己洪玫瑰（樊亦敏 Amy 飾）嘅床照，該幕兩大亮點分別係魯振順表情多多嘅搞笑演出，以及Amy 超性感「床照」。為咗營造氣勢，聶總相約Jack去陽光普照嘅天台講數，身穿白T嘅Jack唔單止熱到成頭汗，雙眼仲被曬到睜唔開；相反聶總全程氣定神閒，着住Mark哥褸嘅佢仲振振有詞話，成場戲感覺似係向經典電影《無間道》致敬。

身穿白 Tee 的 Jack 不但熱至滿頭大汗，雙眼更被曬至睜不開。

魯振順透露呢場戲曾因天雨問題延遲拍攝，正式拍攝當日高溫難擋：「係好熱呀，現場工作人員好好，畀咗啲藿香正氣片我食。Amy又好好，借咗把遮畀我遮太陽。」魯振順飾演嘅聶總市儈奸險，EQ相當低，經常大發雷霆，據知就連 Kent哥亦坦言角色好難拿捏，並大讚魯振順嘅趣怪演出大大提升咗角色嘅入屋度。魯振順事後謙稱全靠劇本寫得好，並感恩可以同偶像Kent哥合作。


對於聶總出陰招，玫瑰決定將計就計。

至於Amy劇中嘅「床照」，雖然只係合成照，但為咗逼真度，玫瑰有躺喺張床度，露出大半個膊頭同手臂拍攝合成原材料。Amy受訪時坦言已盡力去性感：「驚再露太多會引起恐慌。」佢仲笑言劇集嘅「露點擔當」落喺Kent哥、Archie同子冲身上：「子冲同我遲啲會有床戲，佢會冇着衫、滿頭大汗咁攬住我，仲會爬出窗。呢套劇嘅男士，裸露程度係多過女士嘅。Kent哥第一集已經露咗兩點，子冲成日露兩點，Archie都有露點。」另一搞笑位係Amy為咗掩護私會中嘅阿Jack，諗到喺大海面前無厘頭大跳《叉燒包》，Amy超投入嘅忘我演出，贏得不少正評。
為咗自保，玫瑰竟然諗到「合成床照」呢招，夠晒狠。 到底玫瑰同阿 Jack 係咩關係，Amy 就話唔講得大賣關子咁話。為咗掩護阿 Jack，玫瑰大跳搞笑版《叉燒包》，Amy 全程仲要演得好放，夠 晒搞笑。